IClub World Cup idwebe isithombe esigqamile ngeNdebe yoMhlaba ezayo
UMENGAMELI weFifa, uGianni Infantino, uyishayele ihlombe iFifa Club World esanda kusongwa e-United States.
Image: EPA
YIZE iFifa Club World Cup esanda kuphothulwa ibe nesasasa kubalandeli, kodwa lo mqhudelwano uphinde wagqamisa izinkinga okufanele inhlangano eyengamele ibhola emhlabeni, iFifa, izixazulule ngokushesha ngaphambi kweNdebe yoMhlaba yangonyaka ozayo.
IFifa Club World Cup idlalelwe emadolobheni angu-11 aseMelika, kanti iNdebe yoMhlaba izodlalelwa emadolobheni angu-16. I-United States izodlalelwa emadolobheni angu-11, eCanada azoyisingathela emadolobheni amabili kanti eMexico idlalelwe kwamathathu.
Okunye okufanayo ngale miqhudelwano wukuthi neNdebe yoMhlaba izodlalwa kusukela maphakathi noJuni kuze kube maphakathi noJulayi, njengeClub World Cup, okusho ukuthi izodlalwa kusehlobo eNorth America.
Sekuwumlando ukuthi iChelsea ibe ngompetha bokuqala be-Club World Cup entsha ngemuva kokuthi inwetshiwe isuka emaqenjini ayisikhombisa nemidlalo eyisikhombisa yaba namaqembu angu-32 nemidlalo engu-63.
IBlues imangaze iParis Saint-Germain, ebithwelwe ngeqoma, iyithela othulini ngo 3-0 kowamanqamu obuseMetLife Stadium, eNew Jersey, ngeSonto ebusuku.
Umengameli weFifa, uGianni Infantino, akapholisanga maseko wamemezela ukuthi lo mqhudelwano ube yimpumelelo enkulu, wachayisa abebewugxeka.
Ubalule ukuthi bangaphezu kuka-2.5 million abantu ababuke le midlalo bukhoma uma sebehlangene, nezinye igidi eziwubukele kumabonakude emhlabeni wonke, kanye nemali eningi engaphezu kuka-USD 2 billion (elinganiselwa ku-R35.6 billion) ezuzwe yiFifa ngawo.
"Satshelwa ukuthi ngeke kwenzeke. Nakho-ke sekwenzekile, futhi kube yimpumelelo,” kusho u-Infantino.
“Besinabadlali namaqembu aqhamuka kuwo wonke amazwekazi. Lokho kwenza siziqhenye kakhulu, hhayi iFifa kuphela, kodwa nakubantu abathanda ibhola kulawa mazwe namazwekazi abe yingxenye yalo mqhudelwano omkhulu.”
Akungatshazwa ukuthi abalandeli bebhola bawuthandile lo mqhudelwano. Nokho, kunabadlali nabaqeqeshi abazwakalise ukukhathazeka.
“Ukushisa bekungaphezu kwamandla. Ngike ngazunywa yisiyezi phakathi nomdlalo, kwadingeka ngilale phansi. Ngiyethemba ukuthi okungenani bazozishintsha izikhathi zemidlalo ngonyaka ozayo ukuze abantu babukele ibhola elihle,” kusho injini yeChelsea u-Enzo Fernandez kwi-video eshicilelwe yiDAZN ku-X.
UMDLALI weChelsea, u-Enzo Fernandez, ngomunye wabafuna iFifa ishintshe ukwenza eNdebeni yoMhlaba ngonyka ozayo.
Image: EPA
Umqeqeshi weJuventus u-Igor Tudor naye uveze ukuthi abadlali bakhe bathwale kanzima ngenxa yokushisa. Imidlalo eminingi iqale ngo-3 ntambama ngokwesikhathi sase-United States ukuze iqondane kahle nesikhathi sase-Europe.
"Abadlali bami abangu-10 bacele ukukhishwa ngenxa yokuthi bebekhathele kakhulu. Kukhona ukushuba kwesimo ngenxa yokuqina komdlalo bese kuba nzima kakhulu ngenxa yokushisa okudlulele," kusho uTudor ngemuva komdlalo wabo we-quarterfinal neReal Madrid.
Umengameli wenhlangano ebhekelela inhlalakahle yabadlali emhlabeni jikelele, iFifpro, uSergio Marchi, ushiye angalazi egxeka iFifa nomengameli wayo u-Infantino.
"Lo mqhudelwano ubuyinganekwane ehlelelwe inzuzo. Impilo yabadlali ibingakhathalelwe. Imidlalo ibidlalwa ngaphansi kwezimo ezingamukelekile," kusho uMarchi esitatimendeni esikhishwe yiFifpro.
“Lokhu akufanele kugxekwe nje kuphela, kodwa kufanele kuqinisekiswe ukuthi akwenzeki eNdebeni yoMhlaba ngonyaka ozayo.”
Isimo sezulu asigcinanga ngokuhlukumeza abadlali enkundleni kodwa umbani nokuduma kwezulu nakho kuholele ekutheni imidlalo eyisithupha ibambezeleke. Abadlali beChelsea nabeBenfica kudingeke ukuthi balinde ezindlini zokushintshela isikhathi esingaphezu kwamahora amabili ukuze baqedele umdlalo wabo.
Njengoba kuphinde kwakhalwa nangezinye izinkundla ebezinotshani obebungekho esimweni esilungele ibhola, ukuhamba ibanga elide phakathi kwamadolobha kanye namanani aphezulu amathikithi, kuningi iFifa okufanele ikufakele izibuko njengoba iqhubeka nezinhlelo zeNdebe yoMhlaba yangonyaka ozayo.