UNOZINTI weKaizer Chiefs, uBrandon Petersen, uncoma ukulamba nokulangazelela okukhonjiswa ngozakwabo njengoba bezicijela ukuqala kwesizini yeBetway Premieship ka-2025/2026.
Amakhosi afulathele iNingizimu Afrika ngesonto eledlule ayoqala amalungiselelo esizini ezayo eNetherlands. Kulolu hambo azodlala imidlalo yobungani eyisihlanu namaqembu ahlukene. Azodlala umdlalo wokuqala neVitesse Arnhem eRKSV Driel Stadion namuhla ngo-7 ntambama. Ekhempini yeChiefs kukhona nabadlali abayisithupha abasha okunguPaseka Mako, Thabiso Monyane, Nkanyiso Shinga, Flavio Silva, Ethan Chislett noSiphesihle Ndlovu. Ngaphezu kwalokho, kukhona abebeyibamba kwiDStv Diski Challenge okunguNaledi Hlongwane, Thulani Mabaso noKabelo Nkgwesa oqokwe njengomdlali ovelele kwiChiefs kwiDiski.
UPietersen okuphele isizini edlule eselibuyisile ijezi, uthe okwenzeka ekhempini kukhombisa isisekelo esiqinile sesizini ezayo. Ngesizini edlule, iChiefs iqede ishobolo leminyaka ngokuwina iNedbank Cup
"Ukuphakamisa indebe yeNedbank Cup ngesizini edlule yinto ebesiyidinga. Asenzanga kahle kangako ngesizini edlule kodwa lokhu okuhle esikwenzile singakhela phezu kwakho ngezayo. Kufanele kusifake umfutho. Ngiyakubona ukuzinikela, ukuzimisela nokulamba ebusweni babadlali, ikakhulukazi emuva kokuwina indebe. Bafuna ukuzuza okunye. Nginethemba lokuthi lokho kungenye yezinto esizokwakhela isizini ezayo phezu kwazo ukuze siwine ezinye izindebe," kusho uPetersen ethimbeni labezindaba leChiefs
IChiefs iziqeqesha eNetherlands nje, akukacaci ngekusasa lomqeqeshi, uNasreddine Nabi, kwazise abaphathi beqembu abakaphumeli obala ngokuzokwenzeka ngaye. Nakuba uNabi esanenkontileka naMakhosi kodwa izinkulumo zezikhulu zaMakhosi azikuqinisekisi ukuthi uyena ozoqhubeka nokucija iqembu ngesizini ezayo.
Nakuba kunjalo kodwa abalandeli balindele lukhulu kuleli qembu ngesizini entsha. Imidlalo yobungani izobacacisela okuningi ngabadlali abasayinisiwe nabanyuselwe esikimini esikhulu. Abalandeli bazobabona kahle uma iChiefs isibhekene ne-Asante Kotoko yaseGhana emdlalweni weToyota Cup eMoses Mabhida Stadium, eThekwini, ngoJulayi 28.
"Abafana abancane siyabazi, iningi labo sesike salibona lidlala. Siziqeqeshile nabo izikhathi ezimbalwa. Ngikubheke ngabomvu ukubona sidlala ndawonye nabo esikimini esikhulu. Abadlali abasha baseqophelweni eliphezulu. Ngiwubheke ngabomvu umdlalo wobungani esizowudlala. Abantu bazobabona kancane. Kodwa bazobabona kahle kwiToyota Cup futhi nabo bajabule kakhulu ukuthi bazokhombisa ikhono labo phambi kwabalandeli bethu," kusho uPetersen.