IPSG ethubeni lokuziwola zonke izindebe
ABADLALI beParis Saint-Germain abashisa bhe kwiFifa Club World Cup, u-Ousmane Dembele no-Achraf Hakimi.
Image: EPA
I-PARIS Saint-Germain isalelwe ngumdlalo owodwa vo ukuthi iqoqe yonke imiqhudelwano edlale kuyona ngesizini ka-2024/25.
Leli qembu laseFrance lizobhekana nelase-England, iChelsea, kowamanqamu weFifa Club World Cup ngeSonto ngo-9pm eMercedes-Benz Stadium e-Atlanta, e-United States.
Uma i-PSG iyiqumba phansi iBlues yaseLondon izofaka iClub World Cup ohlwini lwezindebe esizinqobile kule sizini.
Inqobe eseLigue 1 ngokuqhwakela ngamaphuzu angu-84, yaguqisa iMonaco ngo 1-0 kowamanqamu we-Trophée des Champions ngoJanuwari, yaphinde yathela phansi iStade de Reims ngo 3-0 kowamanqamu weCoupe de France ngoMeyi 24.
Ithathe indebe yokugcina e-Europe ngoMeyi 31 ngesikhathi ibhubhudla i-Inter Milan ngo 5-0 kowamanqamu we-UEFA Champions League, yaphakamisa le ndebe okokuqala ngqa.
Konke lokhu kwenzeke ngesizini yabo yokuqala ngaphandle kukaKylian Mbappé, owashiya ezaseParis wayojoyina iReal Madrid ngaphambi kokuqala kwesizini ka-2024/25. UMbappé uphethe irekhodi lokushayela iPSG amagoli amaningi emlandweni weqembu kanti ngesikhathi eshiya kwakunemibuzo ngekusasa laleli qembu ngaphandle kwakhe.
Nokho, ngaphansi kobuholi bomqeqeshi waseSpain uLuis Enrique, leli qembu liyiphendulile yonke leyo mibuzo. Lo mqeqeshi ulethe umgqigqo, ukuzethemba nebhola elihle kuleli qembu ebese kuneminyaka ligxekwa ngokungenzi kahle emiqhudelwaneni ehlanganisa amaqembu angaphandle kwaseFrance.
Selokhu leli qembu laxhaswa yiziqumama zaseQatar ngo-2011 belizitamuzela ezweni lalo, kodwa lihluleke uma selibhekene nezinkunzi zakwamanye amazwe, kodwa konke lokhu kushintshile kule sizini.
I-PSG iqale iClub World Cup kuGroup B, lapho ixebule khona i-Atletico Madrid ngo 4-0, yashaywa yiBotafogo ngo 1-0 yase inqoba iSeattle Sounders ngo 2-0. Emidlalweni yomkhumulajezi ikhiphe i-Inter Miami CF ngo 4-0, iBayern Munich ngo 2-0 neReal Madrid ngo 4-0.
"Lena yisizini ekhethekile futhi kusifanele ukuthi sibe kowamanqamu. Sisalelwe yisinyathelo esisodwa kodwa sizobe sibhekene neqembu eliyingozi. Kufanele siwulungiselele umdlalo. Sifuna ukuqopha umlando omusha eqenjini lethu," kusho u-Enrique ngesikhathi ecashunwa yi-website yeFifa.
Uhambo lweChelsea luqale kuGroup D lapho iguqise khona iLos Angeles FC ngo 2-0, yashaywa yiFlamengo ngo 3-1 yabe isiqumba phansi i-Espérance de Tunis ngo 3-0. Kweyomkhumulajezi idlule kwiBenfica ngo 4-1, iPalmeiras ngo 2-1 neFluminense ngo 2-0.
"Kusho lukhulu ukuba kowamanqamu futhi sibe nesizini enhle kakhulu. Siqede kwi-Top 4 kwiPremier League, saba ngompetha be-UEFA Conference League. Ekugcineni sesiyayisonga isizini futhi siyethemba ukuthi singawunqoba lo mqhudelwano," kusho umqeqeshi weChelsea u-Enzo Maresca kwi-website yeFifa.