Kuvuka amagqubu e-UEFA izinkunzi zibanga indawo e-USA
UMGADLI weBayern Munich ongalibheki ipali, uHarry Kane.
Image: EPA
KUSUKELA iqalile iFifa Club World Cup e-United States of America (USA), ompetha be-Uefa Champions League iParis Saint Germain (PSG) yaseFrance nezinkunzi zaseGermany iBayern Munich abasali uma kuqagelwa abangase badle umhlanganiso ngoJulayi 13.
Kungenxa yalesi sithunzi salezi zinkunzi zase-Europe abaningi bakholelwa ekutheni ozonqoba kowe-quarterfinal yePSG neBayern nguyena othwelwe ngeqoma ukuba aqukule isicoco.
Ompetha baseFrance nabaseGermany bazodudulana namuhla ngo-6 ntambama, eMercedes-Benz Stadium, e-Atlanta, Georgia.
Lo mdlalo uyimpinda yowamanqamu weChampions League yango-2019/2020 osekungumlando ukuthi kwanqoba iBayern ngo 1-0.
Kuzodlula amahora ambalwa ezinye izikunzi zase-Europe, iReal Madrid yaseSpain neBorussia Dortmund yaseGermany bange indawo yokugcina kulo mqhudelwano.
OweMadrid neDortmund ungo-10 ebusuku eMetLife Stadium, eNew Jersey.
ISITOBHA seParis Saint-Germain esiphinde sihlohle amagoli, u-Achraf Hakimi.
Image: EPA
Wona ungowamagqubu ngoba uyimpinda yowamanqamu weChampions League yango-2023/2024 lapho kwanqoba khona iMadrid ngo 2-0.
Nakuba kwaba nokuqhuzuka koweBotafogo FC yaseBrazil, i-PSG eholwa uLuis Enrique ifike e-USA ithwelwe ngeqoma kulandela ukudla kwayo iChampions League esibayeni seBayern ezinyangeni ezimbalwa ezedlule.
Ukuqina kwayo kufakazelwe yindlela eshosholoze ngayo kusuka kweyamaqoqo. Isimo siyefana nakwiBayern ngoba nayo ibiziphuzela isobho kwelayo (iqoqo).
Igcine ilale isibili kwiFC Benfica yasePortugal yize ivalele enethini amagoli angu-16 kweyokuqala emine.
EzikaVincent Kompany ziya kulo mdlalo zisazikhotha amanxeba ngokukhishwa yi-Inter Milan kwiChampions League eyayizodlalelwa enkundleni yayo ngesizini edlule.
Sekungumlando ukuthi kowamanqamu i-PSG yanenebula leyo Inter ngo 5-0 eMunich ngasekupheleni kukaMeyi.
“Kusukela isizini edlule iqalile bengilokhu ngiyilandela i-PSG ngakho-ke ngiyazi ukuthi siyobhekana neqembu okungasho lutho kulona ukuthi liqale kanjani kodwa elilwela ukuqeda ngamandla ngaso sonke isikhathi,” kusho uKompany esithangamini nabezindaba ebesihlelwe yiFifa.
“Ukubalandela nokubahlonipha kwethu akusho ukuthi asiziboni siwina kubona,” kusho uKompany owine isicoco seligi neBayern ngesizini yakhe yokuqala.
I-PSG iya kulo mdlalo yazi kahle ukuthi isenkingeni engakanani kwazise iBayern yalishaya ngo 1-0 leli qembu laseFrance kweyamaqoqo yeChampions League nyakenye.
“Siyazi ukuthi sinawo amava okunqoba ngisho ngabe sibhekene naliphi iqembu yinqobo nje uma sibumbene,” kusho uHarry Kane oshayele iBayern amagoli angu-41 emidlalwenu engu-50 kusukela ngo-Agasti wonyaka odlule.