ISafa ‘iwagabhile’ kumaPlay-Offs eMotsepe asaqhubeka nemidonsiswano
IMIDLANDS Wanderers neZizwe United bayingxenye yamaqembu ayisikhombisa azoqhubeka nemidlalo yokuhlungela ukungena kwiMotsepe Foundation Championship ePitoli.
Image: BACKPAGEPIX
ISOUTH African Football Association (Safa) isithathe isinqumo sokuwavalela ngaphandle kumaPlay-Offs kazwelonke aqhubekayo e-ABC Motsepe League amaqembu ase-Eastern Cape nawaseLimpopo ngenxa yemidonsiswano yokuqulwa kwamacala esaqhubeka kulezi zifundazwe zombili.
Le midlalo kazwelonke yokuhlunga amaqembu azokhushulelwa esigabeni seMotsepe Foundation Championship, iqale ngoMsombuluko ngamaqembu ayisikhombisa esikhundleni sayisishiyagalolunye njengokujwayelekile.
NgoLwesithathu, ngosiba luka-Adv Tebogo Motlanthe oyisikhulu esiphezulu, iSafa ikhiphe isitatimende esiqinisekisa ukuthi isithathe isinqumo sokuqhubeka nemidlalo ngaphandle kwala maqembu asenemidonsiswano, ukugwema ukubambezeleka kwayo okungenasidingo nokuhlonipha abaxhasi.
Le midlalo eqale ngoLwesibili eGiant Stadium, eSoshanguve, ePitoli, izosongwa ngeSonto kuyo le nkundla.
Emidlalweni yokuvula ngoLwesibili iThames yaseNorth West ishaye iKakamas Juventus yaseNorthern Cape ngo 2-1, kwathi iMidlands Wanderers yaKwaZulu-Natal yabambana ngo 1-1 neZizwe United yaseWestern Cape.
Amaqembu akhona ayaqhubeka nemidlalo ngoLwesithathu lapho kuzotholana phezulu khona i-African Warriors neGomora United kuGroup B ngo-12 emini, bese iMidlands Wanderers ibhekana neThe Bees yaseMpumalanga kuGroup B ngo-3.30 ntambama.
Khonamanjalo, iSafa yaseLimpopo ikhiphe isitatimende esithi izothumela iMpheni Home Defenders kule midlalo yokuhlunga, yize iSafa isikhiphe isinqumo sokuthi alikho iqembu laseLimpopo elizodlala.
Iqembu lase-Eastern Cape elingelinye labebanga indawo kumaPlayoffs, iSinenkani FC, nalo likhiphe esalo isitatimende lifunga ukuthi lizolwa nesinqumo seSafa ngoba inkantolo ivune lona ngoLwesibili ukuthi liyomela isifundazwe.