OweDowns uzishaya isifuba ngabakwenze koweFifa

UMQEQESHI weMamelodi Sundowns uMiguel Cardoso uhlohla abadlali bakhe ngokufika eNingizimu Afrika beshayela phezulu ngokwazi ukuthi bayimele njengamaqhawe i-Afrika kwiFifa Club World Cup ese-United States of America (USA).

UCardoso ukusho lokhu esithangamini nabezindaba beqeda ukucazelana ngamaphuzu ngo 0-0 neFluminense FC yaseBrazil kowokusonga u-Group F maphakathi nesonto eHard Rock Stadium, eMiami.

Ukubambana kweSundowns neFluminense kuyiqedise endaweni yesithathu kuleli qoqo okuhlezi phezulu kulona iBorussia Dortmund yaseGermany. I-Ulsan HD yaseSouth Koerea iqede isemsileni.

Ngaphandle kwamaphutha ezitobha kulo mqhudelwano, iSundowns ikhombise ukuba yiqembu eliqinile okufakazelwa ukuvula kwayo iqoqo ngokuwina ngo 1-0 kwi-Ulsan.

Kowesibili ka-Group F, leli qembu likaCardoso lizifake ezinhliziyweni zabaningi abalandela unobhutshuzwayo womhlaba yize likhale ngaphansi ngo 4-3 kwiDortmund.

NakoweFluminense iSundowns iwuphathe kwaze kwaba uyaphela kodwa kwaphika igoli.

Akhona amathuba amahle avelile kodwa eligqame kakhulu eliyekwe uThashreeq Matthews esiwombeni sokuqala.

“Amaqembu amaningi abuyele emakhaya eshwiba izandla kodwa iSundowns ithole amaphuzu amane, yashaywa kanye eqoqweni ebelibunjwe ngompetha,” kusho uCardoso.

“Kwabanesikhathi, ngicela bayocubungulisisa kahle i-Ulsan, Dortmund neFluminense khona bezobona ukuthi kukhulu kangakanani okwenziwe yiSundowns kuhlangene izinkunzi zomhlaba.

“Ngifuna abadlali bami bahambe baze baqholoshe uma behla endizeni eNingizimu Afrika ngokwazi ukuthi izwe kanjalo nezwekazi balimele ngesinono nangendlela encomekayo."

Ukuphuma kweSundowns kwiClub World Cup esongwa ngoJulayi 13, kusho ukuthi isizogxila ekuqaleni amalungiselelo okuvikela isicoco seBetway Premiership.