UKhumalo nentshisekelo yomunye umlando kwiDurban July
UJOKHI uS'manga Khumalo ohlose ukunqoba umjaho omkhulu weHollywoodbets Durban July okwesithathu
Image: XOLILE MPISANE
UBONA umjaho wanonyaka weHollywoodbets Durban July, uyithuba lokuqopha omunye umlando ujokhi wakuleli, uS’manga Khumalo.
Lo jokhi odabuka KwaMashu, uzobe egibele ihhashi u-On My Honour kulo mjaho onesiteki sika-R5 million, ozoba seHollywoodbets Greyville Racecourse, eThekwini, ngoJulayi 5.
Ngo-2013, uKhumalo (39) waba ngujokhi wokuqala omnyama ukunqoba lo mdlalo egibele ihhashi uHeavy Metal. Waphinda wadla umhlanganiso ngo-2022, enqoba noSparkling Water.
Usethubeni lokungena ohlwini olukhethekile lojokhi asebeke banqoba lo mjaho amahlandla amathathu. Kubona kubalwa ojokhi abahlonishwayo njengoBertie Hayden, Felix Coetzee noRichard Fourie onqobe ngo-2014, 2019, nango-2020.
Ezinye izinkakha zojokhi, uHarold Wright, Anthony Delpech noPiere Strydom, sezike zaphuma phambili amahlandla amane, kanti irekhodi lokunqoba imijaho eminingi yeDurban July, liphethwe ngu-Anton Marcus, owabashaya emakhanda kahlanu ngo-1993, 2000, 2005, 2007 nango-2018.
“Namuhla ekuseni ngike ngayovakashela ihhashi engizoligibela, ngathola nethuba lokuxoxa nomqeqeshi kanye nomnikazi walo. Libukeka lisesimweni esihle kakhulu,” kusho uKhumalo emcimbini obuseGreyville izolo, lapho kudalulwe khona uhlu lwamahhashi azongenela lo mjaho.
“Kuyajabulisa ukuthi sizoqala esangweni lesithathu. Le ndawo ingcono kakhulu uma siqhathanisa nango-2022, ngesikhathi ngigibele uSparkling Water. Ngalowo nyaka saqala esangweni lika-12 kodwa sakwazi ukunqoba, yize kwakunzima.
"Ngiyethemba ukuthi ngizokwazi ukunqoba lo mjaho okwesithathu kodwa sizobe siqhudelana namanye amahhashi asezingeni eliphezulu kanye nojokhi nabaqeqeshi abanamava. Siyethemba ukuthi konke kuzohamba kahle ngosuku lomjaho.
Uthe: “Akekho ujokhi omnyama osenqobe lo mjaho kathathu ngakho-ke ngisethubeni lokuqopha omunye umlando kwezamahhashi. Ngicabanga ukuthi sengikwenzile konke okufanele ngikwenze, nabaqeqeshi nabanikazi nabo sebeyifezile indima yabo.”
UKhumalo uthe akekho ngaphansi kwengcindezi njengoba elungiselela lo mjaho. Uqhube wathi uvalo luyamshaya uma sekusele kancane umjaho uqale kodwa uyazama ukukugqiba lokho kungaze kudlulele ehhashini asuke eligibele.
“Siyaba novalo kodwa kwenzeka kakhulu uma sekuzoqala umjaho. Sonke siyaqonda ukuthi ziningi kanjani izinto ezenziwayo uma ihhashi lilungiselelwa lo mjaho. Uma kuvuleka amasango wonke umuntu usuke esezilwela yena, yilokho okwenza lo mjaho ube ngokhethekile,” kusho uKhumalo.