IDowns isiyithemba lokugcina le-Afrika koweFifa
IMAMELODI Sundowns yilona qembu lase-Afrika elisanethuba lokudlulela kweyomkhumulajezi kwiFifa Club World Cup.
Image: BACKPAGEPIX
LIQHUBEKILE nokugawula amaqembu ase-Afrika izembe kwiFifa Club World Cup eqhubekayo e-United States njengoba iqembu laseTunisia, i-Esperance, nalo liphume esigabeni samaqoqo.
Leli qembu lijoyine elase-Egypt, i-Al Ahly, elihlulekile ukungena kweyomkhumulajezi kulandela ukuqeda emsileni kuGroup A.
I-Esperance inqotshwe yiChelsea ngo 3-0 emdlalweni wayo wokugcina kaGroup D, yaphelela endaweni yesithathu ngamaphuzu amathathu.
Leli qembu lavula umqhudelwano ngokunqotshwa yiFlamengo yaseBrazil ngo 2-0 ngaphambi kokuguqiswa yiLAFC yase-United States ngo 1-0.
Kuleli qoqo kudlule iFlamengo, eqhwakele ngamaphuzu ayisikhombisa, neChelsea eqede isibili ngayisithupha.
Khonamanjalo, iBenfica yasePortugal idle umhlanganiso kuGroup C ngesikhathi inqoba izinkunzi zaseGermany, iBayern Munich, ngo 1-0 ngoLwesibili ebusuku.
Womabili la maqembu azibekisele izindawo kwi-Last 16 kwazise iBenfica iqede esicongweni ngamaphuzu ayisikhombisa, iBayern yalandela ngayisithupha.
Amaqembu awashe ijezi kuleli qoqo kube elase-Argentina, yiBoca Juinors elale isithathu ngamaphuzu amabili, ne-Auckalnd City yaseNew Zealand ebambe ibhuleki ngephuzu.
Abathandi bebhola base-Afrika sebebambe umoya ukuthi iqembu laseNingizimu Afrika, iMamelodi Sundowns, lingavelelwa wumshophi ofanayo nowe-Al Ahly ne-Esperance njengoba izodlala owokugcina wamaqoqo neqembu laseBrazil, iFluminense, ngoLwesithathu ngo-9 ebusuku.
AmaBrazilians asendaweni yesithathu kuGroup F ngamaphuzu amathathu awathole ngesikhathi eguqisa i-Ulsan HD kowokuvula.
Abe esezibeka engcupheni ngesikhathi enqotshwa yiqembu laseGermany, iBorussia Dortmund, ngo 4-3 emdlalweni wawo wesibili.
IFluminense neDortmund bahamba phambili ngamaphuzu amane iqembu ngalinye kuleli qoqo, nokuphoqa ukuthi iSundowns ilithele phansi iqembu laseBrazil ukuze idlulele kwiLast 16.
IDortmund izobhekana ne-Ulsan ngoLwesithathu ngo-9 ebusuku, nokuwumdlalo okubhekwe ukuthi iwunqobe noma okungenani ithole iphuzu kuwona.
AmaSandawana yiwona asethwele wonke amathemba ezwekazi i-Afrika kwazise iWydad Athletic ngeke isakwazi ukudlule phambili njengoba ingakatholi nelilodwa iphuzu emidlalweni emibili kuGroup G.
Kweminye imidlalo yokusonga uGroup E ezodlalwa ngoLwesine ngo-3 ezintathakusa, i-Inter Milan yase-Italy izotholana phezulu neqembu lase-Argentina, iRiver Plate, bese i-Urawa Reds yaseJapan ibhekana neMonterrey yaseMexico.