UKUDINGA igoli kweMamelodi Sundowns uma isibhekene nePyramids yase-Egypt emdlalweni womlenze wesibili wamanqamu weCaf Champions League, kungabukeka kuwumqansa kodwa iphini lomqeqeshi, uSteve Komphela, likholwa wukuthi ubuthaka baleli qembu ababubonile bungaba wukhiye.
ISundowns izobhekana nePyramids e-30 June Stadium, eCairo, e-Egypt, kusasa ngo-7 ebusuku. AmaBrazilians asemkhankasweni wokuwina indebe yesibili yeChampions League agcina ukuyiqukula ngo-2016 esaqeqeshwa nguPitso Mosimane. Ukuze lokhu kuphumelele, adinga ukushaya igoli, kungangeni lutho kuwona. Lokhu kungenxa yokuthi emdlalweni womlenze wokuqala avumela iPyramids yashaya igoli ekuhambeni, waphela zibambene ngo 1-1 eLoftus Versfeld Stadium, ePitoli, ngempelasonto edlule. Uma umdlalo wakusasa uphela zibambene ngo 0-0 noma ngo 1-1 kuzokhahlelwa amaphenathi.
Okwengenza ubunzima obubhekene neSundowns, wukuthi izobhekana nePyramids engayazi induku emidlalweni engu-23 yasekhaya yakamuva. Iwine engu-19, yadlala ngokulingana kwemine. Ngakolunye uhlangothi, iSundowns ayisazi isibhaxu emidlalweni eyisishiyagalolunye yakamuva emiqhudelwaneni eyahlukene. Iwine eyisithupha, yadlala ngokulingana kwemithathu.
Akubuzwa ukuthi ithimba labaqeqeshi leSundowns lidinga ukusebenza ngokuphindiwe ukuthola inxeba AmaBrazilians azongela ngalo ukuze abuye nendebe e-Cairo.
"Sikutholile lokhu esikutholile. Sizokugcina lokhu esikutholile, sikusebenzise ukuze sisizakale e-Egypt. Zikhona izinto eziningi esizibonile. Kukhona lapho obekufanele nathi senze kangcono khona, sikubhalile phansi lokho ezincwadini zethu. Sizozama ukukulungisa. Sikutholile esikutholile,"kusho uKomphela egwema ukuyikhulumela eziko.
IPyramids isethubeni lokuwina iChampions League okokuqala emlandweni wayo. Iyiqembu elisha eCairo elisanda kuthengwa yizimpunyela ezifike zafaka itshe lemali, yasayinisa abadlali abaseqophelweni eliphezulu okubalwa kubona uRamadan Sobhi osebuya kwi-English Premier League. Nokho inselelo elinayo wukuthi alinazo izinkumbi zabalandeli abazoyinika umfutho njengoba kujwayelekile emaqenjini asenhla ne-Afrika.
UKomphela uthe kungaba yingozi ukuya ngomqondo wokuthi bazodlala enkundleni engenabo abalandeli.
"Kuzophenduka amatafula uma sizocabanga ngaleyo ndlela, sicabanga ukuthi kukhona okushodayo. Uma uya empini ungenazo izinhloso ezinkulu futhi ucabanga ukuthi abukho ubungozi obungako, uzolimala. Akufanele sicabange ngaleyo ndlela. Bayiqembu eselishaye amagoli amaningi futhi elihle. Alikho iqembu elingaba kwiChampions League lingekho ezingeni elifanele. Ngakho ngeke sikubheke lokho. Kuyingozi kakhulu," kusho uKomphela.
ISundowns izothembela kubadlali okubalwa kubona uLucas Ribeiro ophinde waqokwa njengomdlali ovelele wenyanga uMeyi kwiBetway Premiership, Iqraam Rayners, Peter Shalulile nabanye. Igoli alishaye bebhekene neMagesi, liqokwe njengeBetway Premiership Goal of The Month, kwathi umqeqeshi weSundowns, uMiguel Cardoso wakhala wemuka nomklomelo weBetway Premiership Coach of The Month okwesithathu ngesizini ka-2024/2025.
Related Topics: