INKAKHA yeKaizer Chiefs, uReneilwe "Yeye" Letsholonyane, ixwayise abadlali baleli qembu abanqobe isicoco seligi yeDStv Diski Challenge (DDC) ngezimenenja zabadlali ezizobanamathela njengoba sebesemehlweni abantu.
NgoLwesihlanu eFNB Stadium, eNasrec, iChiefs iklomelise abadlali beqembu leDiski abenze kahle ngesizini ka-2024/2025. Amakhosi awine iligi yeDiski okokuqala eminyakeni engu-10 selokhu wasungulwa lo mqhudelwano. Ngaphezu kwalokho, iqoqe amaphuzu amaningi kunawo wonke amaqembu awine iligi emlandweni weDiski (70). I-Chiefs isizomela iNingizimu Afrika emqhudelwaneni waminyaka yonke iPremier League Next Gen Cup ozoba se-India emasontweni ezayo. Nyakenye lo mqhudelwano udliwe yiStellenbosch.
Umcimbi weChiefs wokuklomelisa abadlali beDiski ubuhanjelwe ngabazali babadlali, izikhulu zeqembu nezinkakha ezazikhona ngesikhathi igcina ukuwina isicoco seligi yeBetway Premiership okunguLetsholonyane, Willard Katsande, Siphiwe Tshabalala noMandla Masango. UNaledi Hlongwane ukhale wemuka nomklomelo weTop Goal Scorer (14), kwathi oweMost Improved Player wagoduka noKabelo Nkgwesa owushebe nowePlayer of The Season. Unozinti osanda kuwina i-Under 20 Africa Cup of Nations (Afcon) neqembu lesizwe, uTakalani Mazhamba, uwine oweGoalkeeper of The Season. Umdlali wasesiswini, uPheko Phago ugoduke nomklomelo wePlayers' Player of The Season.
ULetsholonyane udonse ngendlebe abadlali ngezimenenja ezizobalandela, zibathembise izulu nomhlaba.
"Seniyaziwa manje, izimenenja zabadlali zinifonela zonke izinsuku. Lezo zimenenja zizonithembisa izinto eziningi manje ngoba ningompetha beligi yeDDC. Iningi lazo liqamba amanga. Umsebenzi wenu uzozikhulumela. Enikwenzile kuzonitholela umsebenzi kwenye indawo. Okwenza enkundleni nokuxhumana naleli gama (leChiefs) kuzonivulela iminyango. Ngakho, ukuba yingxenye yeChiefs kuyinto enkulu. Ningajabuleli enikuthola ngoba nidlalela iChiefs, kusebenzeleni lokho. Izinto zizonihambela kahle ngisho seniliyekile ibhola," kusho uLetsholonyane.
UYeye, owayeyibamba esiswini, wajoyina iChiefs ngo-2008 esuka kwiJomo Cosmos. Wahamba eNaturena ngo-2016 esewine inqwaba yezicoco ngaphansi kwabaqeqeshi abehlukene. Uyale abadlali beDiski ngokuthi bengagxili kakhulu ezinkundleni zokuxhumana.
"Ngangiwumfana omncane ngisuka kwiJomo Cosmos ngingaziwa ngabantu abaningi. Emuva kwemidlalo emibili yokuqala ngikwiChiefs, ngase ngaziwa. Ngamenyezelwa kwiFacebook, ngalandelwa ngabantu abaningi ngenxa yendlela elikhulu ngayo igama leChiefs. Esikhathini samanje sekukhona i-Instagram, sesidlala khona kakhulu kunokufanele sikwenze enkundleni. Ngakho isiyalo sami sithi yenzani okufanele nikwenze enkundleni, ninciphise ezinkundleni zokuxhumana," kusho uLetsholonyane.