Inselelo kwiBafana koweCosafa wangenyanga ezayo

LIZOQALA umqhudelwano linenselelo yokubuyisa indebe yeCosafa Cup iqembu lesizwe lakuleli lebhola labesilisa, iBafana Bafana, njengoba seliwazi amaqembu eliqhathwe nawo kulo mqhudelwano ozodlalwa ngenyanga ezayo.

Lo mqhudelwano uzobanjelwa eBloemfontein, eFree State, kusukela ngo Juni 4 kuya ku-15 kanti iBafana ifakwe kuGroup A neZimbabwe, Mozambique neMauritius.

Nakuba iNingizimu Afrika isisingathe iCosafa Cup iminyaka eyisikhombisa ilandelana, iqembu  lakuleli lagcina ukuphakamisa le ndebe ngo-2021, linqoba  iSenegal ngo 5-4 kuma phenathi.

Ngo-2022 lakhishwa yiMozambique kuma-quartefinal sekukhahlelwa amaphenathi, ngo-2023 lanqotshwa yiZambia ngo 2-1 kowandulela owamanqamu, kanti nyakenye alizange lidlule esigabeni samaqoqo.

Ngonyaka odlule leli qembu belicijwa yiphini lomqeqeshi weBafana, uHelman Mkhalele. Omunye wabadlali abagqame kulo mqhudelwano, uRushwin Dortley, usebalwa nabadlali asebeyizinsika kweliphekwa nguHugo Broos.

Lo mqhudelwano ungaphinde usetshenziswe njengengxenye yamalungiselelo e-African Nations Championship (Chan), ezodlalwa ngo-Agasti. Iqembu lakuleli leChan liqeqeshwa nguMolefi Ntseki, okungenzeka anikwe izintambo kwiCosafa noma abambisane noMkhalele.

Iqembu elihamba phambili ngezicoco selokhu iCosafa Cup yasungulwa ngo-1997 yiZambia, esidle umhlanganiso amahlandla ayisikhombisa. IZimbabwe iyalandela ngezicoco eziyisithupha kanti iBafana isibe ngompetha kahlanu.

Iqembu elizobe livikela isicoco, i-Angola, seliyiqukule amahlandla amane le ndebe.

Kulo nyaka iqembu elingaphandle kwesifunda iCosafa elimenyiwe ukuzodlala yiMorocco, eqhathwe neMadagascar ne-Eswatini kuGroup C. Uhlu oluphelele lwemidlalo, izinsuku nezikhathi okuzodlalwa ngazo kuzomenyezelwa ngokuhamba kwesikhathi.

Amaqoqo eCosafa Cup yanonyaka

Group A: South Africa, Mozambique, Mauritius, Zimbabwe

Group B: Angola , Namibia , Malawi , Lesotho

Group C: Morocco , Madagascar , Eswatini

Group D: Zambia, Comoros, Botswana