Zindala zombili kowamanqamu weSpurs ne-United
SEBEQALILE ukutheleka eSan Mames abalandeli abazothamela umdlalo wamanqamu we-UEFA Europa League phakathi kweTottenham Hotspur neManchester United.
Image: PA
ITottenham Hotspur neManchester United bazobe bebheke ukugqiba ihlazo lokungenzi kahle kule sizini uma sebetholana phezulu kowamanqamu we-UEFA Europa League kusihlwa.
Lo mdlalo ozodlalelwa eSan Mames Stadium, edolobheni iBilbao, eSpain, uzoqala ngo-9 ebusuku.
Womabili amaqembu abaphoxile abalandeli emiqhudelwaneni yasekhaya kule sizini. ISpurs isendaweni ka-17 kwi-log yePremier League, yakhishwa emzuliswaneni wesine kwi-FA Cup, yakhishwa kowandulela owamanqamu kwiCarabao Cup.
IRed Devils yona isendaweni ka-16 kwi-log, yawashiswa ijezi emzuliswaneni wesihlanu kwi-FA Cup nakuma-quarterfinal eCarabao Cup.
ISpurs ikhiphe i-AZ Alkmaar, Eintracht Frankfurt ne-Bodø-Glimt kweyomkhumulajezi ye-Europa, i-United yadlula kwiReal Sociedad, Lyon, ne-Athletic Club.
Womabili amaqembu aseke ayiphakamisa le ndebe kwazise iSpurs yayinqoba isaziwa nge-UEFA Cup ngo-1972 nango-1984, i-United yayithatha ngo-2017.
"Sisebenze kanzima ukuze sifike lapha. Sifuna ukuthatha isinyathelo esilandelayo futhi silethe le ndebe ekhaya. Yisicoco esikhulu futhi esihambisana nethikithi lokudlala kwiChampions League ngesizini ezayo. Sesiside isikhathi singayinqobi indebe, ngakho-ke lokho kubaluleke kakhulu," kusho umqeqeshi weSpurs, u-Ange Postecoglou, esithangamini nabezindaba kwi-website ye-UEFA.
Umqeqeshi we-United, uRúben Amorim, uthe nakuba ukunqoba le ndebe kungeke kusule zonke izici abanazo, kungalibuyisa ithemba ngaphambi kwesizini ezayo.
"Kungasisiza ukuthi siqede isizini yethu ngenothi elihle ngoba ukuwina isicoco sase-Europe kubaluleke kakhulu. Ngeke kuyishintshe isizini yethu, abadlali bayakwazi lokho futhi wonke umuntu oyingxenye yeqembu uyakwazi lokho, kodwa kungasisiza ukuthi sibe nomuzwa wokuthi kukhona okuhle esikwakhela ikusasa,” kusho u-Amorim.
ISpurs ne-United sebebhekane kathathu kule sizini, yomithathu imidlalo yanqotshwa iSpurs. Yaqumba phansi i-United ngo 3-0 emdlalweni weligi ngoSepthemba nyakenye ngo 4-3 kuma-quarterfinal eCarabao ngoDisemba, nango 1-0 kowesibili weligi ngoFebhuwari nonyaka.