Amacala azovimba imibhiyozo kompetha beMotsepe
USIHLALO weDurban City, uFarook Kadodia, osola ukuphazanyiswa kweqembu lakhe ngokuvulelwa amacala ngoba sekubonakala lihamba nesicoco seligi yeMotsepe Foundation Championship
Image: BACKPAGEPIX
I-PREMIER Soccer League (PSL) iqede injabulo nomfutho ohambisana nokulangazelela ukuphela kwesizini yeMotsepe Foundation Championship ka-2024/2025, imemezela ukuthi ngeke ilamukelise indebe okwamanje iqembu elizoqeda esicongweni.
NgeSonto, kuzodlalwa imidlalo yokugcina yalesi sigaba okubhekwe ukuthi icacise ngeqembu elizowina iligi, lenyukele kwiBetway Premiership. Amaqembu amabili azoqeda endaweni yesibili neyesithathu azothola ithuba lesibili ngokudlala imidlalo yama-Play Off neliqede endaweni ka-15 kwiPremiership. IDurban City ihlezi esicongweni se-log ngamaphuzu angu-55 emidlalweni engu-29. Idinga iphuzu emdlalweni wokugcina ezowudlala neCape Town Spurs e-Athlone Stadium, eKapa, ngeSonto ngo-3 ntambama, ukuze iqukule indebe yokuba ngompetha beChampionship, inyukele kwiPremiership. Ixinwe kabi yi-Orbit College ngamaphuzu angu-52. Leli qembu lizovala neLeruma United, esivele igawulwe yizembe emdlalweni ozoba se-Olympia Park Stadium, eRustenburg, ngesikhathi esifanayo.
Izolo, iPSL imemezele ukuthi ngeke iyikhiphe indebe ngeSonto ngenxa yokuthi kunamacala asetafuleni layo okungenzeka umphumela wawo uyishintshe indlela i-log eyiyona. Kusabalele ukuthi kunesimangalo esithinta ukubhaliswa komdlali weCity, uSaziso Magawana, obedlalela iMarumo Gallants ngesizini edlule.
"Yindlela ebijwayele ukwenza ngayo iNational Soccer League eminyakeni edlule, ukuthi idlulisele indebe yeMotsepe Foundation Championship eqenjini elihlezi phezulu emuva komdlalo wokugcina wesizini. Ngebhadi, kukhona okufakwe ngamaqembu ekomitini eliqondisa ubugwegwe okungakaqedwa. Akukacaci kwiPSL ukuthi kanjani nokuthi kuzokuphazamiseka kangakanani ukuma kwamaqembu kwi-log. Iligi isinqume ukungasheshi ikhiphe indebe njengoba izinhlaka ezifanele zisalungisa lokhu," kusho ingxenye yesitatimende sePSL.
Lokhu kuchaza ukuthi ngisho iCity ingawina eKapa, kodwa ngeke ijabule kwazise izinto zisengashintsha. Ukunyuka kwaleli qembu likaFarouk Kadodia kubhekwe ngabomvu esifundazweni iKwaZulu-Natal, kwazise kuzobuyisela isibalo kwamane amaqembu aqhamuka kusona ayibamba kwiPremiership kulandela ukushabalala kweRoyal AM.