IDowns iziqhelise kwiPirates esicongweni seBetway
UMGADLI weMamelodi Sundowns u-Iqraam Rayners.
Image: BACKPAGEPIX
IMamelodi Sundowns inwebe igebe esicongweni seBetway Premiership iqumba phansi iRichards Bay FC ngo 3-0 eLoftus Versfeld ngoLwesibili ebusuku.
Amagoli amaBrazilian ashaywe ngu-Arthur Sales no-Iqraam Rayners esiwombeni sokuqala, elinye lavalelwa nguMarcello Allende kwesesibili.
Lo mphumela ushiye amaSandawana esicongweni ngamaphuzu angu-58 emidlalweni engu-23.
Leli qembu lasePitoli seliyishiya ngamaphuzu angu-12 iPirates, esidlale imidlalo engu-21.
EzikaMagebhula zizenzele phansi ngesikhathi zinqotshwa yiSekhukhune United ngo 1-0 e-Orlando Stadium.
Igoli eliweze iBabina Noko kulo mdlalo lingqomfelwe phakathi nguTresor Tshibwabwa ngomzuzu ka-58.
Ezimnyama ziqede umdlalo zingasaphelele ngenxa yokuthi uNkosinathi Sibisi ukhishwe ngekhadi elibomvu umdlalo usuyophela.
Omunye umdlalo weBetway Premiership obuseDanie Craven Stadium, iStellenbosch FC iguqise iChippa United ngo 1-0 ngegoli likaSanele Barns.
ISekhukhune isisendaweni yesine ngamaphuzu angu-44 emidlalweni engu-25 kanti iStellies ikweyesine ngamaphuzu angu-41 emidlalweni engu-24.
Ukunqotshwa kweBay kuyishiye isasendaweni ka-13 ngamaphuzu angu-26 emidlalweni engu-25.