AbeChiefs bavivela eyabakhaya nePirates
UNOZINTI weKaizer Chiefs, uBruce Bvuma, nozakwabo uBradley Cross no-Edmilson Dove.
Image: BACKPAGEPIX
I-KAIZER Chiefs izobhekana neMarumo Gallants emdlalweni weBetway Premiership namuhla ntambama yazi ukuthi lo mdlalo weligi uyisinyathelo sokuqala ochungechungeni lwemidlalo emithathu emqoka ezoba nomthelela omkhulu kwisizini yayo yokuqala ngaphansi kobuholi bomqeqeshi uNasreddine Nabi.
Amakhosi neGallants bazodudulana eFNB Stadium ngo-3 ntambama, emdlalweni osho lukhulu kuwo womabili la maqembu.
IChiefs isabambelele endaweni yesishiyagalombili kwi-log ngamaphuzu awu-30 emidlalweni engu-24. Iwadinga wonke amaphuzu engawathola emidlalweni esele ukuze igweme okwenzeka ekupheleni kwesizini edlule, ihluleka ukuqeda kwiTop 8.
IGallants nayo iwalambele lawa maphuzu kwazise ayiphephile endaweni ka-11 ngamaphuzu angu-27 emidlalweni engu-25. Isengozini yokuficwa ngamaqembu ayilandelayo njengeLamontville Golden Arrows, Richards Bay, Cape Town City neSuperSport United, nokungayibeka engcupheni yokugawulwa yizembe.
Iqembu lasePhefeni lizobe libheke ukusebenzisa lo mdlalo njengesiqalo somgqigqo omuhle obheke kwemibili ezayo nezimbangi zalo ezinkulu, i-Orlando Pirates.
Lezi zinkunzi zaseSoweto zizobhekana koweBetway Premiership eFNB Stadium ngoMeyi 3, ngaphambi kokududulana kowamanqamu weNedbank Cup eMoses Mabhida Stadium ngoMeyi 10.
Unozinti weChiefs, uBruce Bvuma, uvumile ukuthi abekho ezingeni abebebheke ukufinyelela kulona kule sizini kodwa bangashintsha okuningi kule midlalo emithathu ezayo.
“Asikenzi kahle kule sizini, siyakwazi lokho. Aseneme ngendawo esikuyona kwi-log futhi kuningi okufanele sikulungise endleleni esidlala ngayo,” kusho uBvuma.
"Sekuyiminyaka emine sagcina ukuya kowamanqamu. Sagcina kwiCAF Champions League, kanti emiqhudelwaneni yasekhaya sagcina ngo-2019. Singenile kowamanqamu manje (kwiNedbank) ngakho-ke kukhona okuhle esingakuthatha kule sizini, yize singekho endaweni enhle kwiligi.”
Amazwi kaBvuma ananelwe nguzakwabo uDillan Solomons, ovumile ukuthi yize begxile emdlalweni wanamuhla neGallants, ikhona nemicabango yemidlalo emibili yabakhaya nePirates.
"Kunzima. Kusobala ukuthi ngeke ukugweme ukucabanga ngomdlalo wamanqamu. Noma yimuphi umuntu uyawulangazelela umdlalo onjalo kodwa okumqoka indlela olungiselela ngayo umdlalo ngamunye," kusho uSolomons.
"IMarumo ayilona iqembu elilula, yize kunabantu abacabanga kanjalo. Sizodlala nomdlalo wabakhaya weligi ngaphambili komkhulu kakhulu wamanqamu. Yimidlalo edinga ukuthi uqine ngokomqondo, ukhombise ukuzethemba namandla,” uphethe kanje.