Amajimbos aphunyukwe yithuba lokuya kwi-Afcon eguqiswa yiZambia

Amajimbos (1) 1

Zambia (1) 2

Iqembu lesizwe lika-Under 17, Amajita, lihlulekile ukuzibekisela indawo kwiCaf U-17 Africa Cup of Nations (Afcon) kulandela ukuguqiswa yiZambia emdlalweni owandulela owamanqamu eCosafa U-17 Youth Championship, e-UJ AW Muller Stadium, eGoli, ngoLwesithathu ntambama.

Amagoli eZambia avalelwe phakathi nu-Abe Nyirongo noMapalo Simute. ElaMajita lashaywa nguSimphiwe Mlondo ngesiwombe sokuqala.

IZambia isiyobhekana ne-Angola kowamanqamu ngoLwesihlanu ngo-3 ntambama e-UJ Soweto Stadium, eSoweto. I-Angola iguqise iZimbabwe ngo 2-0 kowokuqala wowandulela owamanqamu.

Ukufinyelela kweZambia ne-Angola kowamanqamu eCosafa U-17 kusho ukuzibekisela kwiCaf U-17 Afcon ezodlalelwa e-Ivory Coast ngonyaka ozayo.

Kube ngesifanayo naseqenjini lamantombazane lakuleli lika-Under 17, Abantwana, elingalibonanga elidlalayo likhishwa yiMadagascar ngo 1-0 kuma-quarterfinal. Owamanqamu eCosafa U-17 Girls Championship uzodlalwa yiZambia neLesotho ngoLwesihlanu ngo-11 emini e-UJ Soweto Stadium.

Ukwehluleka kwelabafana elicijwa nguVela Khumalo ukuzibekisela indawo kwi-Afcon kusho ukuqhubeka neshobolo laleli qembu lesizwe lika-Under 17 elingakaze liwunqobe lo mqhudelwano. Lafinyelela kowamanqamu ngo-2015 kodwa laguqiswa yiMali ngo 2-0 kowamanqamu.

Bekulindeleke ukuthi Amajita alandele ezinyathelweni zeqembu lika-U/20, Amajita, elidle umhlanganiso kwiCosafa U-20 ngo-Okthoba, lazibekisela indawo kwiCaf U-20 Afcon ezodlalelwa eMorocco.