Kulindeleke kusiphuke izidindi koweLiverpool neMan City

LIVERPOOL v MANCHESTER CITY

E-Anfield, eLiverpool kusasa ngo-5.45pm, ku-SS3

NGEMUVA kwesonto abathandi bebhola abalandela i-English Premier League, kade bezitika ngomdlalo wabakhaya baseManchester, obuphakathi kweManchester City, neManchester United, kusasa kulindeleke ukuthi baphinde babheme bakholwe. Emdlalweni wakusasa kuzotholana phezulu ezinye izinkunzi zeligi, iLiverpool neCity.

Okudala isasasa elikhulu ngomdlalo weLiverpool, neMan City wukuthi zombili izingqungqulu zisembangweni oshisa phansi wesicoco sePremier League, ne-Arsenal, njengoba seziqala ukuhubela sakusha kule sizini.

Yize iLiverpool kuyiyona esazihola phambili njengamanje kwi-log yePremier League, yehlukaniswe yiphuzu elilodwa kuphela neMan City esendaweni yesibili, kulandele i-Arsenal esendaweni yesithathu, nayo eyehlukaniswe yiphuzu elilodwa neMan City.

Omunye umdlalo obhekiwe ngempelasonto ngowe-Arsenal, neBrentford, ngoMgqibelo ngo-7.30 ebusuku, e-Emirates Stadium, eLondon.

Ngeledlule iMan City iqhubekile nokukhonya kowomkhaya baseManchester, ngokubhaxabula iManchester United ngo 3-1. Kanti iLiverpool inqobe sekuvalwe amehlo kwiNottingham Forest ngo 1-0, kwathi i-Arsenal yathumela umyalezo ezimbangini zayo ngokunenebula iSheffield United ngo 6-0.

Cishe izingqapheli zebhola zingase zithathe umdlalo weLiverpool neMan City njengongase ucacise ngombango wesicoco sePremier League kodwa iMan City isazodlala ne-Arsenal, kuthi iTottenham Hotspur ibhekane ne-Aston Villa womabili amaqembu asengakwazi ukudunga umcimbi.

I-Aston Villa isendaweni yesine kwi-log, iTottenham isendaweni yesihlanu, kanti iTottenham isazotholana phezulu neLiverpool.

Ngesizini edlule amaqembu akwazile ukuthatha amaphuzu amathathu emidlalweni ehlukene, emzuliswaneni wokuqala iLiverpool yanqoba ngo 1-0, kwathi kowesibili iMan City yaphendula ngesibhaxu sika 4-1.

Emzuliswaneni wokuqala kule sizini, e-Etihad, eManchester, zishayane zaze zabukana kuba ngo 1-1.

Zikhona izihlabani ezibhekiwe kuwo womabili amaqembu kulo mdlalo. Kodwa akungatshazwa ukuthi umgadli weThe Citizens, u-Erling Haaland obuyele efomini yakhe, nomgadli weThe Reds, uMohamed Salah oseluleme ngokwanele ekulimaleni kwakhe, amehlo azobe ethe njo kubona ngethemba lokuthi babhakuzise inethi.

Ngakolunye uhlangothi uJurgen Klopp, umqeqeshi weLiverpool, okuyisizini yokugcina lena eqeqesha iqembu, unengcindezi yokubuyisa isithunzi seklabhu yase-Anfield. Phela iqembu lagcina ngesizini ka-2019/2020 ukuphakamisa isicoco sePremier League, ngakho kumele uKlopp, ashiye iqembu linqobe isicoco.

Imidlalo ye-English Premier League:

NgoMgqibelo - Ngo-2.30pm: Manchester United v Everton

Ngo-5pm: Crystal Palace v Luton Town; Bournemouth v Sheffield United; Wolves v Fulham

Ngo-7.30pm: Arsenal v Brentford

ngeSonto - Ngo-3pm: Aston Villa v Tottenham Hotspur

Ngo-4pm: West Ham v Burnley; Brighton v Nottingham Forest

Ngo-5.45pm: Liverpool v Manchester City