Ungase ucacise okuningi oweReal Madrid neGirona kwiLa Liga

REAL MADRID v GIRONA

E-Santiago Bernabeu, eMadrid, namuhla ngo-7.30pm

UKUQALA isizini ngonyawo oluhle kweGirona sekwenze yathishwa ngezinye izingqapheli zebhola njengeqembu elingase libalwe nasembangweni wesicoco seligi yeSpanish La Liga kule sizini ka-2023/24.

Nebala leli qembu, ebelithathwa njengebelingaziwa ngabaningi, lisalokhu liqhubekile nokukhombisa izimpawu zokuba yiqembu elizophosela inselelo amaqembu ayizingqungqulu kwiLa Liga, iReal Madrid neBarcelona.

Njengamanje iGirona isendaweni yesibili kwi-log yeLa Liga ngamaphuzu angu-56. Ihlukaniswe ngamaphuzu amabili kuphela neMadrid ehlezi phezulu ngamaphuzu angu-58.

Okuyingakho umdlalo wayo weligi neMadrid eSantiago Bernabeu Stadium, eMadrid, namuhla ngo-7.30 ebusuku ubhekwe ngabomvu.

IGirona isashaywe yiMadrid kuphela kule sizini. Lokhu kwenzeke ngesikhathi iyibhaxabula ngo 3-0 kowomzuliswano wokuqala. Lokhu kwenza umdlalo wanamuhla uthathwe njengowamagqubu.

Ukunqoba kweMadrid umdlalo wanamuhla kungasho ukuvula igebe phakathi kwayo neGirona okuyilona qembu njengamanje okusabukeka lisabanga nayo isicoco seligi njengoba izimbangi zayo ezindala, iBarcelona, zisabhinjelwa yizinto kule sizini phezu kokuba kuyizona ezingompetha abavikela isicoco.

Abadlali bawo womabili la maqembu, uJude Bellingham weMadrid no-Artem Dovbyk weGirona, baphakathi kwabadlali abathathu abasazihola phambili ngokubhakuzisa inethi kule sizini kwiLa Liga ngamagoli angu-14 umdlali emunye. Omunye nguBarjo Mayoral weGetafe naye onangu-14.

IBlanquivermells, okuyisiteketiso seGirona, engakaze isinqobe isicoco seLa Liga emlandweni wayo, ibhekene nenselelo yokuqhubeka nomgqigqo wayo ukuze igcine iphumelele ukuqopha umlando ngokusinqoba okokuqala lesi sicoco.

Kanti ngakolunye uhlangothi iLos Blancos, ephekwa nguCarlo Ancelotti, ibhekene nenselelo yokusinqoba lesi sicoco seLa Liga njengoba yehlulekile ukusivikela ngesizini edlule isihlwithwa yizimbangi, iBarcelona, ngemuva kokusinqoba kwayo ngesizini ka-2022/23.

Imidlalo yeSpanish La Liga:

Namuhla - Ngo-3pm:

Alaves v Villarreal

Ngo-5.15pm:

Real Sociedad v Osasuna

Ngo-7.30pm:

Real Madrid v Girona

Ngo-10pm:

Las Palmas v Valencia

Kusasa - Ngo-3pm:

Getafe v Celta Vigo

Ngo-5.15pm:

Mallorca v Rayo Vallecano

Ngo-7.30pm

Sevilla v Atletico Madrid

Ngo-10pm:

Barcelona v Granada