UKlopp oshiyayo nenselelo yePremier League kwiLiverpool

UKUMEMEZELA komqeqeshi weLiverpool, uJurgen Klopp, ukuthi uzoyishiya ekupheleni kwesizini kuqubule ukuqagela ngozovala isikhala sakhe.

Maningi amagama abaqeqeshi abayamaniswa nesikhundla sokuqeqesha leli qembu lase-Anfleld ngesizini ezayo. Kulaba baqeqeshi kubalwa uXabi Alonso weBayer Leverkusen, uRoberto De Zerbi weBrighton & Hove Albion noPeter Bosz wePSV Eindhoven.

UKlopp (56) osekuyisizini yakhe yesishiyagalolunye eqeqesha iLiverpool, umemezele ngesonto eledlule ukuthi uzoshiya eqenjini ekupheleni kwesizini, wakubeka ngokucacile ukuthi usafuna ukuthatha ikhefu ekuqeqesheni.

Lo mqeqeshi odabuka eGermany, ujoyine iLiverpool ngesizini ka-2015/2016 esuka kwiBorussia Dortmund.

Kula masizini ayisishiyagalombil ese-Anfield, usenqobe izicoco ezimqoka okubalwa kuzo i-English Premier League ngesizini ka-2019/20, i-Uefa Champions ngesizini ka-2018/19 neFA Cup ka-2021/22.

Nakuba ngesizini edlule lo mqeqeshi enganqobanga nesisodwa isicoco neqembu elihluleke nawukuzibekisela indawo kwiChampions League kodwa kule sizini iLiverpool Ikhombisa izimpawu zokuba yiqembu elizokwazi ukulwela ukuwina isicoco seligi. Ngesizini edlule, iLiverpool iqede endaweni yesihlanu kwi-Premier League.

Njengamanje i-The Reds yiyona esazihola phambili kwi-log yePremier League ngamaphuzu angu-51 emuva kwemidlalo engu-22.

Izotholana phezulu ne-Arsenal kusasa ngeSonto, e-Emirates Stadium, eLondon, ngo-6.30 ntambama emdlalweni obhekwe ngabomvu kule mpelasonto kwiPremier League.

Njengoba sekuyinto eyaziwayo ukuthi uKlopp uyashiya e-Anfield ekupheleni kwesizini, akungatshazwa ukuthi abalandeli beqembu ayikho into engabajabulisa ngokulibona liphakamisa isicoco sePremier League.

Yize zisekhona nezinye izicoco ezisazodlalelwa, okubalwa kuzona neseFA Cup kodwa ukunqoba esePremier League nalezi zingqungqulu yikho kanye okungenza umqeqeshi ashiye eqenjini ngegiya eliphezulu futhi asale ekhunjulwa ngabalandeli balo ngemisebenzi emihle alenzele yona esaliqeqesha.

Imidlalo ye-English Premier League:

Namuhla - Ngo-2.30pm:

Everton v Tottenham Hotspur

Ngo-5pm:

Brighton v Crystal Palace; Burnley v Fulham; Newcastle United v Luton

Ngo-7.30pm:

Sheffield United v Aston Villa

Kusasa - Ngo-4pm:

Bournemouth v Nottingham Forest; Chelsea v Wolverhampton; Manchester United v West Ham United

Ngo-6.30pm:

Arsenal v Liverpool