Zigwemene izinkunzi zePSL kuqhathwa aweNedbank Cup
ZIWELE ngelibanzi izinkunzi zePremier Soccer League (PSL) zitomula amaqembu ezigaba eziphansi emqhudelwaneni iNedbank Cup.
Amaqembu azogijimisana kwi-Last 32 yeKe Yona Ya Rona, atonyulwe ngoLwesine ebusuku eGoli. Kuqhathwe angu-16 ePremiership, ayisishiyagalombili eMotsepe Fundation Championship nayisishiyagalombili ezinhlaka zeSafa avela ezifundazweni ezahlukene eMzansi. Uma kuqhathwa amaqembu emiqhudelwaneni eyahlukene, kuhlala kubhekwe ukuthi kudibane amaqembu amakhulu ebholeni laseMzansi okuyiKaizer Chiefs, Orlando Pirates neMamelodi Sundowns. Nokho kulokhu, lezi zinkunzi zithole amaqembu adlala ezigabeni eziphansi. IPirates evikela indebe eyiwine nyakenye emuva kokwehlula iSekhukhune United, izolinda iqembu elizomela isifunda iMpumalanga elingakaziwa. EZimnyama yizona ezizovakasha eMpumalanga kulo mdlalo. IChiefs, eyagcina ukuwina iNedbank Cup ngo-2013, izokwamukela iMilford yaKwaZulu-Natal edlala kwiChampioship. Leli yithuba lokugcina laMakhosi lokuwina indebe kule sizini ka-2023/2024 kulandela ukuphunyukwa yiMTN8 neCarling Knockout egcine idliwe yiStellenbosch FC. ISundowns, esiwine iNedbank amahlandla amane, izovakashela iNB La Masia yaseGauteng edlala kwiChampionship. AmaBrazilians akubuzwa ukuthi azolwela ukuyiwina le ndebe yokugcina yesizini kulandela ukwehlulwa yiPirates kowamanqamu weMTN8 ezinyangeni ezedlule. Nakuba amaqembu asezigabeni eziphansi ejwayele ukugila izimanga uma ebhekene nadlala kwiPremiership kodwa ukutonyulwa kwawo yizinkunzi akubuzwa ukuthi kuyalehlisa uvalo nokukhathazeka kubaladeli bazo.
Isiyonke imidlalo yeNedbank Cup imi kanje
NB La Masia v Mamelodi Sundowns
Golden Arrows v TS Galaxy
JDR Stars v Hungry Lions
SuperSport United v Cape Town City
University of Pretoria v Cape Town Spurs
Maritzburg United v Paarl United
Safa MP v Orlando Pirates
Stellenbosch v Pretoria Callies
Highlands Park v Sekhukhune United
AmaZulu v Royal AM
NC Professional v Chippa United
Platinum City Rovers v Moroka Swallows
Richards Bay FC v Polokwane City
FC Ravens v Spain FC
D General v Madristas
Kaizer Chiefs v Milford