IGirona nenselelo yomgqigqo kwiLa Liga ngomzuliswano wesibili

Indlela iGirona esayiqale ngayo isizini ka-2023/24 yeSpanish La Liga cishe isishiye abathandi bebhola abaningi abalandela ibhola lase-Europe bezibuza beziphendula ngaleli qembu elingenamlando wezicoco kodwa eselikhombise izimpawu zokuphonsela inselelo izingqungqulu zakule ligi iReal Madrid neBarcelona kule sizini.

Yize iGirona iyiqembu elidala laseSpain njengoba yasungulwa ngo-1930, ukugidagida kwayo ezigabeni eziphansi yikho okuyenze yafana neqembu “elingaziwa” kuyo yonke le minyaka njengoba yakhushulelwa okokuqala ngqa esigabeni seLa Liga ngesizini ka-2016/2017.

Kwathi ngesizini ka-2018/2019 yagawulwa yizembe yaphindela kwiSegunda Division (La Liga 2), nokho yaphinda yakhuza ibuya kwiLa Liga ngokuphumelela imidlalo yokuhlunga ngesizini elandelayo.

Ngesizini edlule obekuyisizini yesithathu esigabeni seLa Liga. Iqede endaweni yeshumi kwi-log, okuyindawo efanayo naleyo eyaqeda kuyona ngesizini yayo yokuqala kulesi sigaba ngo-2016/17.

Nokho iGirona eqeqeshwa uMigel Angel Sanchez Munoz, owaziwa ngelikaMichel, selokhu kuqale le sizini ikhombisa ukuba yiqembu elizobhincisela nxanye amaqembu amaningi njengoba kumanje ibambene ngamaphuzu angu-48 neReal Madrid ehlezi phezulu, yona isendaweni yesibili nokwenza ihlukaniswe ngumehluko wamagoli kuphela neMadrid emidlalweni engu-19 yeligi.

IGirona esashaywe kanye emidlalweni engu-19 kule sizini, ukubhaxabula kwayo iBarcelona ngo 4-2 ngoDisemba 10, okulandelwe ukubhaxabula i-Atletico Madrid ngo 4-3, yikho osekwenze abaningi baqala ukuyibhekisisa njengoba isalokhu iqhubekile nokuqoqa amaphuzu.

Ngemuva kokushaya i-Elche ngo 2-0 kwiCope Del Rey, izobuyela kweyeligi ngokubhekana ne-Almeria kusasa ngo-3 ntambama, e-Estadio Mediterraneo, e-Almeria.

Empeleni ukubamba iqhaza kwiSuper Cup kwezimbangi zayo iReal Madrid, kunika iGirona ithuba lokuqhwakela kwi-log yeLa Liga uma ingahlula i-Almeria.

Nokho, umzuliswano wesibili wesizini oqalayo yiwona ozocacisa ukuthi ngabe ifomu yeGirona ayiwona yini umlilo wamaphepha.

Abadlali abagqamile kwiGirona:

Umgadli u-Artem Dovbyk, umdlali wasesiswini u-Aleix Garcia nozakwabo uYangel Herrera, noDaley Blind umdlali wasemuva.

UDovbyk (26) odabuka e-Ukraine, ujoyine iGirona ngaphambi kokuqala kwale sizini esuka kwiDnipro-1 yase-Ukraine, useqalile ukukhombisa izimpawu zokuba ngumgadli obukhali njengoba esehlohle amagoli angu-11, nokumbeka ohlwini lwabadlali abasashaye amagoli amaningi kwiLa Liga kule sizini.

Umqeqeshi: UMichel (48) odabuka khona eSpain, useqeqeshe amaqembu ambalwa aseSpain okubalwa kuwo iRayo Vallecano, neHuesca, okungamaqembu awakhuphulele esigabeni seLa Liga ngokwehlukana esuka kwiSegunda Division kumasizini edlule.

Nokho, lo mqeqeshi asikho isicoco aseke wasinqoba kwiLa Liga, nokwenza kubhekwe ngabomvu ukuthi ngabe kule sizini angawuqopha yini umlando ngokunqoba isicoco sakhe sokuqala kulesi sigaba.

Imidlalo yeSpanish La Liga:

Namuhla - Ngo-3pm:Las Palmas v Villarreal

Ngo-5.15pm: Mallorca v Celta Vigo

Ngo-7.30pm: Athletic Club v Real Sociedad

Ngo-10pm: Real Betis v Granada

Kusasa - Ngo-3pm: Almeria v Girona

Ngo-5.15pm: Cadiz v Valencia