UBanda unxusa lingazitshwa ithalente kumaSalga Games
ABADLALI beqembu leKing Cetshwayo (engosokhaya) bebungazela ukufinyelela kowamanqamu wamaSalga Games, eMhlathuze Sports Complex, eRichards Bay, izolo Isithombe: SALGA GAMES FACEBOOK
INKAKHA ye-Orlando Pirates uPatson "Sparks" Banda, ehlabeke umxhwele ngethalente elibone kumaSalga Games, iphonsele inselelo amaqembu aKwaZulu-Natal adlala kwiPremier Soccer League (PSL) ngokubheka abadlali besavunwa yiminyaka.
UBanda owayengunozinti wokuqina wePirates eminyakeni edlule, ubephakathi kwezinkakha zebhola ebezimenyiwe ukuba yingxenye yale midlalo yamaSalga eqale ngoLwesihlanu nesongwe izolo ngeSonto ntambama, eMhlathuze Sports Complex, eRichards Bay.
Le yimidlalo yaminyaka yonke yezinhlobo ezahlukene, lapho kudlana khona imilala amaqembu ezifunda ezingu-11 zaKwaZulu-Natal.
Nokho, kulo nyaka kwenzeke okungajwayelekile njengoba izifunda ezintathu, uThukela, iHarry Gwala, naMajuba, zingakwazanga ukubamba iqhaza kule midlalo ngenxa yezinkinga okuthiwa ezithinta imali.
Lokhu kuqinisekiswe uSiwe Shabalala wakwaSalga, othe ukungabi bikho kwamaqembu akulezi zifunda ezintathu, kungenxa yokushodelwa yimali komasipala balezi zifunda yokuhlelela abadlali bakhona ukuzoba yingxenye yale midlalo..
"Izinga liphezulu kakhulu kule midlalo, ithalente liningi kulesi sifundazwe iKwaZulu-Natal. Ngokwami bengingajabula uma amaqembu akulesi sifundazwe ePSL, ikakhulukazi lawa eDiski Challenge (DStv) engabathatha manje laba bafana asebebonakele besavunwa yiminyaka njengoba bengu-Under 19, ngoba uma bebayeka manje bazozithola behanjelwa yiminyaka esigabeni sama-amesha.
Ngisho nawo amaqembu amakhulu adlala kwiDStv Premiership angingabazi ukuthi angahlomula ngethalente lalaba badlali kule midlalo," kusho uBanda.
UBanda ubehambisana nezinye izinkakha zebhola zaseKZN, okunguMlungisi "Professor" Ngubane, uSiyabonga "Nsimbi" Sangweni noSandile "AK 47" Ndlovu, ebezimenywe kule midlalo.
"Laba ngabadlali abadinga ukunikwa ithuba emaqenjini ePSL, ngoba basikhombisile sonke sibona ukuthi ithalente likhona kubona."
UBanda usho kanjena nje, ngoLwesihlanu okuwusuku okuqale imidlalo, kubonakele usihlalo weRichards Bay, uSifiso "Jomo" Biyela nethimba lakhe labaqeqeshi eliholwa wuKaitano Tembo noVusumuzi Vilakazi, neleDStv Diski Challenge eliholwa wuNkosenhle Ngema.
Omunye obonakele uTebogo Moloi weTM Scouts, owaziwa ngokuba neso elibukhali ekuhlonzeni abadlali bebhola basezigabeni zama-amesha abase emaqenjini ePSL.
UMoloi uveze ukuthi kunabadlali ababili abahlonzile azobayisa emaqenjini ePSL.
Le midlalo yamaSalga idlalwa nje, kukhalwa ngokuthi ayixhaswanga uMnyango wezeMidlalo KwaZulu-Natal. Kuvele ukuthi kuze kwangenelela abeCebolethu Funeral Services, Amathole Funeral Services, Ithala Bank ne-Aquelle, njengabaxhasi.