U-Broos nesicelo kwiSafa nePSL

I-SOUTH African Football Association (Safa) isithembise ukumeseka umqeqeshi weqembu lesizwe, iBafana Bafana, uHugo Broos, ngakho konke akudingayo ngaphambi kwe-Africa Cup of Nations (Afcon) engoJanuwari.

NgoJanuwa 4 -9, iBafana izoba nekhempu eStellenbosch, eWestern Cape, ngaphambi komdlalo wobungani neLesotho ozobe ungavulelekile kubalandeli, ngoJanuwari 10.

Elakuleli lizobe selibhekisa amabombo, eKorhogo, e-Ivory Coast ngoJanuwari 11, lapho kuzoba ne-Afcon, okuyizinsuku ezinhlanu ngaphambi komdlalo walo wokuvula weGroup E libhekene neMali.

Ngaphambi kokuthi ezikaBroos ziyozama ukwenza kangcono kunesigaba sama-quarterfinal okwaqeda kusona iqembu likaStuart Baxter ngo-2009, kumele liqinisekise ukuthi lizilungisele ngendlela.

U-Broos ufuna ukuthi imidlalo ye-DStv Premiership iye ekhefini ngaphambi kukaKhisimusi, ukuze athole isikwati esingakhathele ngaphambi kwekhempu nemidlalo ye-Afcon.

Isikhulu esiphezulu se-Safa, uLydia Monyepao, sikhuluma ngemuva komhlangano wokugcina wonyaka wesigungu esiphezulu, iNational Executive Committee obungoMgqibelo, siveze ukuthi siyaxoxa nozakwabo bePremier Soccer League (PSL), uMato Madlala, ukuzama ukuthola isisombuluko esicelweni sikaBroos.

“Sesilibhekile ikhalenda, sabona ukuthi amaqembu azoba nemidlalo kuze kube nguDisemba 30 (31). Sesixhumene ne-PSL ukubacela ukuthi babheke izifiso zomqeqeshi,” kusho uMonyepao.

“Umqeqeshi ucela ukuthi iligi iqedwe ngoDisemba 23, ukuze abadlali bezothola isikhathi sokuphumula ngaphambi kokuthi kuqale ikhempu ukuze abe nesikwati esiwumqemane.

Kukhona esengikutholile okuvela esikhulwini esiphezulu (se-PSL). (UMato Madlala) uyaxhumana nesigungu, uthe uzobuyela (kwi-Safa) nesikushoyo mayelana nalokhu okubekwe umqeqeshi.”

UManyepoa uthembise ukuthi uzobuyela kuMadlala namuhla ngethemba lokuthi bazothola impendulo egculisayo.

Ezinye izindaba ezinhle ezitholwe yi-Safa wukuthi iphini lomqeqeshi, uHelman Mkhalele, lizokwazi ukuhlala ebhentshini kwi-Afcon.

Bekuke kwanemibiko ethi uBroos ubheka iphini njengoba uMkhalele enganayo i-Caf A License noma i-Pro License, okuthiwa yimigomo ebekiwe ngabo bonke abaqeqeshi abahlala ebhentshini emiqhudelwaneni yase-Afrika.

Kuze kwavela igama likaRhulani Mokwena noManqoba Mangqithi beMamelodi Sundowns, ukuthi kungase kucelwe bona bayosiza.

UManyepao ukuchithile lokhu, wathi uMkhalele uzobe esebhentshini noBroos ngemuva kokuthola imvume enhlanganweni eyengamele ibhola e-Afrika, i-Caf.

“Akunankinga. I-Caf ayinayo imigomo ngokuthi wubani ohlala ebhentshini kwi-Afcon. Inayo kuphela emiqhudelwaneni yamakilabhu. Kwi-Afcon, sibuzisisile kubona, ayikho imigomo enjalo yabaqeqeshi futhi anginalwazi ngokuthintwa kweSundowns,” kusho uMonyepao.

UMkhalele ubethathiwe eqoqweni lokuqala labenza iCaf A License kwi-Safa emasontweni edlule kodwa wagcina engakwazanga ukuhamba amakilasi ngenxa yokubambeka emidlalweni yeBafana yokuhlungela iNdebe yoMhlaba.

Kulindeleke ukuthi ezinsukwini ezizayo uBroos amemezele isikwati sakhe sokuqala se-Afcon, bese esiphundla ekuqaleni konyaka ozayo.