Kubhekwe uHaaland noSalah koweMan City neLiverpool
INKALIMEVA yomgadli weLiverpool, uMohamed Salah, ibhekwe ngabomvu emdlalweni wanamuhla neManchester City Isithombe: EPA
MANCHESTER CITY V LIVERPOOL
E-Etihad Stadium, eManchester, ngoMgqibelo ngo-2.30pm
UKUBUYELWA yifomu kweLiverpool nokuvutha uphondo kwesethenjwa somgadli wayo, uMohamed Salah kanjalo nowezimbangi, iManchester City, u-Erling Haaland, akungatshazwa ukuthi kudala isasasa lomdlalo wezingqungqulu ze-English Premier League, (EPL).
IMan City engosokhaya emdlalweni wanamuhla ntambama e-Etihad, iza emdlalweni, ngaphambi kwekhefu leFifa ishayane yaze yabukana ngo 4-4 neChelsea koweligi. Ukushuba kwalowo mdlalo kushiye iningi labathandi bebhola bengawuvali umlomo.
ILiverpool ibhaxabule iBrentford ngo 3-0, lokhu okwenza amaqembu aye kowanamuhla ejahana eduze ngamaphuzu. IMan City isaqhwakele phezulu kwi-log ngamaphuzu angu-28, yehlukaniswe yiphuzu elilodwa neLiverpool esendaweni yesibili ngamaphuzu angu-27.
UHaaland usehlohle amagoli angu-13 emidlalweni engu-12 kanti uSalah ovutha engabaselwe usehlohle angu-10 emidlalweni engu-12, lokho kuyinkomba yokuthi kulindelwe lukhulu kulezi zinkalimeva zabagadli ezingenankinga yokubhakuzisa inethi.
Irekhodi lokuhlangana kwezingqungqulu livuna iMan City emdlalweni wanamuhla njengoba iLiverpool yagcina ngoNovemba 2015, ukwehlula iMan City esibayeni sayo, e-Etihad, eManchester.
Yize kubukeka kuseva ngoba kusadlalwe imidlalo engu-12 kuphela kwiPremier League kule sizini, umgqigqo wamaqembu womabili ubhekwe kakhulu ngoba sekusele imidlalo eyisikhombisa kusongwe umzuliswano wokuqala wesizini.
I-The Citizens engompetha abavikela isicoco seligi esisiphakamise amasizini amathathu elandelana, ibhekene nenselelo yokugcina umgqigqo kuze kube sekugcineni njengoba yenzile ngesizini edlule.
Ngakolunye uhlangothi i-The Reds eyagcina ngesizini ka-2019/2020 ukuzuza isicoco sePremier League, ukuqeda kwayo endaweni yesihlanu kwi-log ngesizini edlule, kuyiphuthisele ngengqayizivele yethuba lokudlala kwi-Uefa Champions League kule sizini, ngakho ibhekene nenselelo yokubuyisa isithunzi kule sizini.
Isiyonke imidlalo ye-English Premier League:
Namuhla - Ngo-2.30pm: Manchester City v Liverpool
Ngo-5pm: Burnley v West Ham United; Luton v Crystal Palace; Newcastle United v Chelsea; Nottingham Forest v Brighton; Sheffield United v Bournemouth
Ngo-7.30pm: Brentford v Arsenal
Kusasa - Ngo-4pm: Tottenham Hotspur v Aston Villa
Ngo-6.30pm: Everton v Manchester United