UVan Wyk ethubeni lokuqopha umlando neBanyana

UBUYISIWE eqenjini lesizwe labesifazane, owayengukaputeni, uJanine van Wyk, onethuba lokuqopha umlando ngokuba umdlali wase-Afrika osedlale imidlalo eminingi kunabo bonke eqenjini lesizwe.

UVan Wyk okuveke ukuthi udube ikhempu edlule maphakathi nayo, ufakwe eqenjini elizodlala eyokuhlungela iWomens Africa Cup of Nations neBurkina Faso.

IBanyana, engompetha bezwekazi i-Afrika, izodudulana neBurkina Faso ekuhambeni ngoNovemba 30, bese ibhekana naleli qembu ekhaya ngoDisemba 4. Uma ihluleka ukunqoba uma sekuhlanganiswe imilenze yomibili ngeke ilithole ithuba lokuvikela isicoco esinqobe eMorocco ngonyaka odlule.

UVan Wyk, usedlale imidlalo engu-183 eqenjini lesizwe. Umdlali wase-Afrika ophethe irekhodi lokudlala imidlalo eminingi kunabo bonke eqenjini lesizwe ngu-Ahmed Hassan, owadlala imidlalo engu-185 eqenjini lase-Egypt kusukela ngo-1995 kuya ku-2012.

Umqeqeshi weBanyana Banyana, uDesiree Ellis, uthe bazokwenza konke okusemandleni ukuthi uVan Wyk alithole ithuba lokudlala kule midlalo kwazise akuhambanga ngohlelo ngesikhathi ebizelwe eyokuhlungela ama-Olympic neDemocratic Republic of Congo ngenyanga edlule.

Waze waphela umlenze wokuqala esasebhentshini, nokwaholela ukuthi adube, angabe esabuyela ekhempini ngaphambi komlenze wesibili. Nokho, u-Ellis uthe lolu daba selulungisiwe ngaphakathi futhi akathandi ukubuyela kosekwadlula.

“Sizokwenza konke okusemandleni ethu ukuthi u-Janine agcine ekwazile ukudlala leyo midlalo emibili. Akulona nje irekhodi elibaluleke kuyena yedwa kodwa ngicabanga ukuthi yirekhodi elisemqoka ebholeni labesifazane kuleli, kwiSafa nasebholeni labesifazane kuleli zwekazi,” kusho lo mqeqeshi.

“Ekhempini edlule, ngike ngabuzwa ngabezindaba ukuthi ngabe lisekhona yini elinye ithuba lokuthi adlale, ngavuma. Lelo thuba selifikile. Lolu daba seludingidiwe ngaphakathi neSafa futhi ngingathanda ukuma lapho,” kusho u-Ellis.

U-Ellis uphawule ngobunzima abadlule kubona ngesikhathi behlanganisa iqembu elidlale neDRC ngenyanga edlule ngenxa yokuthi bekunabadlali abalimele, abanye bengawatholi amaphepha abagunyaza ukuthi baye kwamanye amazwe, abanye bebhala izivivinyo.

Yize besebaningi abalimele njengoBambanani Mbane, Refiloe Jane, Sibulele Holweni, Tiisetso Makhubela, Bongeka Gamede nabanye, uthe kuyamthokozisa ukuthi sebekhona abadlali abancane asekwazi ukuthembela kubona.

U-Ellis uthe kumqoka ukuthi iBanyana yenze kahle ekuhambeni nasekhaya ukuze izibekisele indawo kwiWafcon ezophinde idlalelwe eMorocco ngonyaka ozayo.

IBanyana izohlangana ngeSonto, bese ilubangisa eBurkina Faso ngoMsombuluko. Iqembu u-Ellis alimemezele ngoLwesine linabadlali abangu-24, okusho ukuthi kusazokhishwa oyedwa ngaphambi kokuthi lithathe lolu hambo.

Iqembu leBanyana Banyana elizobhekana neBurkina Faso:

Onozinti: Andile Dlamini ( Mamelodi Sundowns), Kaylin Swart (JVW FC), Katlego Moletsane (Royal AM)

Izitobha: Karabo Dhlamini , Lebohang Ramalepe (Mamelodi Sundowns), Fikile Magama, Lonathemba Mhlongo (UWC), Faith Nokuthula (Blackburn Rovers), Janine van Wyk (JVW FC), Noko Matlou (DS Eibar), Asanda Hadebe (Sunflower).

Esisiswini: Linda Motlhalo (Glasgow City), Kholosa Biyana (Mamelodi Sundowns), Sphumelele Shamase, Thubelihle Shamase (University of Johannesburg), Amogelang Motau (UWC).

Abagadli: Nicole Michael, Samkelisiwe Selana (TS Galaxy), Gabriela Salgado (JVW FC), Jermaine Seoposenwe (CF Monterrey), Noxolo Cesane (UWC), Wendy Shongwe (University of Pretoria), Hildah Magaia (Sejong Sportstoto), Thembi Kgatlana (Racing Louisville).