Izenzele phansi i-UWC ilahla amaphuzu kwiSuper League

APHINDE ancipha amathuba okuthi i-University of Western Cape ihlwithe iMamelodi Sundowns Ladies isicoco seHollywoodbets Super League ngesikhathi leli qembu lithelwa phansi yiTS Galaxy Queens ngo 2-0 emdlalweni obuseSolomon Mahlangu Stadium, KwaMhlanga, ngoLwesithathu ntambama.

I-UWC ibibheke ukunqoba okwesithathu kulandelana kodwa kwaphinde kwayibhedela.

Lo mdlalo ububhekwe ngabomvu kwazise leli qembu eliphekwa nguThinasonke Mbuli elisaqhwakele kwi-log, belisanda kuqumba phansi i-University of Pretoria ngo 3-0 ne-JVW FC ngo 1-0.

IQueens, esendaweni yesithathu kwi-log ibisinqobe imidlalo emihlanu ilandelana selokhu yagcina idliwe yiRichmond ngo 1-0 ngoSepthemba.

Kuyiwe ekhefini iqembu lasekhaya lihamba phambili ngo 2-0 ngamagoli ashaywe nguLesego Nkoane noNicole Michael, izivakashi zahluleka ukubuya esiwombeni sesibili.

I-Queens isasendaweni yesithathu ngamaphuzu angu-60 emidlalweni engu-28 kanti UWC isasesicongweni ngamaphuzu angu-72 emidlalweni engu-29.

Ompetha abasha base-Afrika, iSundowns Ladies, basendaweni yesibili ngamaphuzu angu-66 emidlalweni engu-25 njengoba bebesamile kwiligi yasekhaya, bedlala kwiCaf Women’s Champions League abayinqobe ngeSonto.

Bazoqhubeka nemidlalo yabo yeSuper League namuhla ntambama lapho bezodudulana neTshwane University of Technology ngo-3 eLucas Moripe Stadium.

Iqembu likaJerry Tshabalala lagcina ukudlala kwiSuper League ngo-Okthoba 23, liguqisa i-UWC ngo 1-0 ekuhambeni.

I-TUT ibe ngelinye la maqembu athole isibhaxu kwiRichmond, eshaywa yileli qembu laseNorthern Cape ngo 2-1 ngeSonto.

ISundowns Ladies izodlala imidlalo emihlanu ilandelana eduze ukuze iphothule isizini yayo ngoDisemba 6. Kungenzeka kushaye leso sikhathi isisivikele isicoco uma isheshe ilivala igebe lamaphuzu ayisithupha eselivulwe i-UWC, esisalelwe wumdlalo owodwa ezowudlala neDurban Ladies ngeSonto.