Ngabe sezibaliwe izinsuku zikaTen Hag kwiMan United?

UKUPHIKWA yimiphumela kweManchester United, selokhu kuqale le sizini ka-2023/24, kulibeka engcupheni ikusasa lomqeqeshi u-Erik ten Hag. Liyaqhubeka nokubhacaza iqembu.

UTen Hag (53), ujoyine iMan United ngaphambi kokuqala kwesizini edlule ethatha izintambo kuRalf Rangnick, obeyibamba mqeqeshi ngemva kokukhonjwa indlela kuka-Olle Gunnar Solskjaer.

Ukunenebulwa yiManchester City ngo 3-0 kowomkhaya ngeledlule, kungahumusheka njengokuqonga kwengcindezi kumqeqeshi weMan United. Leli qembu liyiqale ngonyawo olubi isizini futhi bese kuwumdlalo wesihlanu lehlulwa emidlalweni eyishumi ye-English Premier League, esadlaliwe.

Izodlala neFulham kowePremier League, eCraven Cottage, namuhla ngo-2.30 ntambama.

Ngokubika kweTeamTalk, ukufika kwengquphunga uSir Jim Ratcliffe, okubhekeke ukuba ithenge u-25% wamasheya kwiMan United, yikhona okubukeka kuzokwenza izinguquko eqenjini. Kusukela kwibhodi yeqembu, abaqondisi, nasohlangothini lwabaqeqeshi nabadlali.

Kuvela ukuthi uRatcliffe kubukeka engeke amxoshe njengamanje uTen Hag ngoba kuthiwa usakholelwa kuyena. Kepha, ukunqindwa kwakhe amandla ekuthatheni izinqumo ekusayineni abadlali kubukeka kuyikho okuzomdlisela ogageni lo mqeqeshi, odabuka eHolland.

Ngokusho kweTeamTalk, nguPaul Mitchell okubukeka ezonikezwa isikhundla sokuba yiSporting Director, kwiMan United.

UMitchell owaziwa ngomsebenzi wokuhlonza ithalente labadlali, ubenza umsebenzi ofanayo kwiMonaco yaseFrance, edlala kwiLigue 1, okuyiligi lapho kudlala iNice, iqembu eliphethwe nguRatcliffe futhi onobudlelwano obuhle noMitchell.

Kubukeka sengathi uTen Hag usakholelwa kakhulu kubadlali aseke wasebenza nabo phambilini nabebeyizihlabani emaqenjini adlala kwi-Eredivisie yaseHolland, lapho ebeqeqesha khona ngaphambi kokujoyina iMan United.

Omunye wabadlali okukhalwa ngabo ngokuthi abakalenzeli lutho iqembu ngu-Antony Matheus dos Santos, ongumdlali wasesiswini othengwe ngezizumbulu zemali esuka kwi-Ajax ngesizini edlule. Kumanje ungowesithathu ukuba ngumdlali othengwe ngemali enkulu ukubedlula bonke emlandweni weMan United, ngemuva kukaPaulg Pogba, noRomelu Lukaku.

Ngesizini edlule, obekuyakhe yokuqala uTen Hag kwiMan United, uthathe iqembu walibeka endaweni yesithathu kwi-log yePremier League, lazibekisela indawo kwi-Uefa Champions League, walinqobela indebe i-EFL Cup, nokho okungeyona indebe enkulu.

“Nakuba engeke axoshwe manje uTen Hag kodwa ukunqindwa kwakhe amandla ekusayiniseni abadlali, kuyinkomba yokuthi ukuqhubeka nokungatholi imiphumela egculisayo kweqembu, nakanjani kuzogcina kuzinciphisile izinsuku zakhe e-Old Trafford,” kusho uqweqwe lentatheli yebhola yase-Italy, uFabrizio Romano.

IRed Devils nakwiChampions League ayiqalanga kahle njengoba esigabeni samaqoqo isithole isibhaxu kabili ishaywa yiBayern Munich ngo 4-3, yalandelwa yisibhaxu sika 3-2 esithole kwiGalatasaray, ngaphambi kokunqoba kwiFC Copenhagen ngo 1-0, ezodlala nayo owomlenze wesibili ngoLwesithathu.

Imidlalo ye-English Premier League:

Namuhla - Ngo-2.30pm: Fulham v Manchester United

Ngo-5pm: Brentford v West Ham; Manchester City v Bournemouth; Sheffield United v Wolverhampton Wanderers; Burnley v Crystal Palace; Everton v Brighton

Ngo-7.30pm: Newcastle United v Arsenal

Kusasa - Ngo-4pm: Nottingham Forest v Aston Villa

Ngo-6.30pm: Lutton Town v Liverpool

NgoMsombuluko - Ngo-8pm: Tottenham Hotspur v Chelsea