UKgatlana ubuyise ithemba kwiBanyana kuhlungelwa ama-Olympics
IGOLI likaThembi Kgatlana linike ithemba iNingizimu Afrika ngamathuba ayo okudlulela emzuliswaneni olandelayo wokuhlungela ama-Olympics Isithombe: BACKPAGEPIX
Democratic Republic of Congo (1) 1
Banyana Banyana (0) 1
IGOLI elishaywe nguThembi Kgatlana esiwombeni sesibili libuyise iqembu lakuleli lesizwe lebhola labesifazane lidlala ngokulingana ngo 1-1 neDemocratic Republic of Congo emlenzeni wokuqala weyokuhlungela ama-Olympic eStade de Martyrs, eKinshasa, ngoLwesithathu ntambama.
La maqembu asezotholana phezulu emlenzeni wesibili ozodlalelwa e-Orlando Stadium ngoMsombuluko ngo-4 ntambama.
IBanyana sekuzomele ilwele ukunqoba ekhaya noma ivimbe iDRC ingatholi amagoli asekuhambeni ukuze idlulele emzuliswaneni olandelayo wokuhlunga.
Iqembu elizonqoba uma sekuhlanganiswe imilenze yomibili lizobhekana nozodlula phakathi kweTanzania neBotswana.
Kuyiwe ekhefini iDRC ihamba phambili ngegoli elivalelwe nguGrace Mfwamba sekuzophela isiwombe sokuqala, ngaphambi kokuthi uKgatlana atholele elakuleli elokulinganisa ngasekuqaleni kwesesibili.
IBanyana kuphoqeleke ukuthi isebenzise udonga lwasemuva olungajwayelekile njengoba uBambanani Mbane esalimele, kanti uBongeka Gamede akaluthathanga uhambo oluya eDRC ngenxa yokuthi ubesaqedela izivivinyo zakhe e-University of Western Cape kuleli sonto.
Elakuleli belibophele uWendy Shongwe ngakwesokunxele emuva, uFikile Magama ngakwesokudla, noLonathemba Mhlongo benoKarabo Dhlamini maphakathi.
Likhombise umfutho zibekwa lisebenzisa amabhola amade ukuthola uKgatlana, obengukaputeni. Kwale kancane ukuthi lo mgadli ozinze e-United States of America, ashaye igoli ngomzuzu wesihlanu, ibhola lakhe ladlula phezu kancane kwepali.
Iqembu lasekhaya lithole ithuba lokuqala ngomzuzu wesishiyagalolunye ngesikhathi uMerveille Kanjinga ededela imbumbulu yeshodi engaphandle kwebhokisi, kodwa unozinti weBanyana uKaylin Swart wakwazi ukulivimba.
UKgatlana ubethola izikhala ezinhle phambili kodwa eqhelelene noHildah Magaia, kudingeka ukuthi azizamele yedwa. Ngomzuzu ka-12 udlubulundele ngakwesokunxele kodwa unozinti weDRC, uFideline Ngoy, washeshe waphuma epalini ukuzovimba ibhola lakhe.
ILeopards Dames iqale ukuzethemba isilidweba esiswini ibhola iqonde phambili, kwadingeka ukuthi uSwart aphinde asebenze ngomzuzu ka-21, evimba elinye ibhola eliqinile likaRuth Kipoyi.
Ligcine limdlile unozinti wakuleli ngomzuzu ka-40. UNaomie Kaba-Kaba ugobe ibhola elihle ngakwesokunxele, lathola uMfwamba ngakwesokudla ebhokisini, wadonsa intambo ayizwe ngendaba uSwart, kwayiwa ekhefini iqembu lasekhaya lihamba phambili ngo 1-0.
Umqeqeshi weBanyana, uDesiree Ellis, wenze ushintsho ngesikhathi kubuywa ekhefini, wafaka uNicole Michael endaweni ka-Amogelang Motau.
Lisheshe lasebenza lelo qhinga ngesikhathi uMichael egqashuka ngakwesokudla ngomzuzu ka-48 ngaphambi kokulibeka ezinyaweni zaKgatlana, olinamathelise enethini esebhekene nonozinti.
Owayengukaputeni weBanyana, uJanine van Wyk, bekulindeleke ukuthi afakwe kule midlalo njengoba edinga imidlalo emibili ukuze abe ngumdlali wase-Afrika osedlale imidlalo eminingi kunabo bonke eqenjini lesizwe kodwa wagcina engangenanga waze waphela umdlalo.