ITottenham nenselelo yomgqigqo kweyePremier League

NAKUBA i-Tottenham Hotspur iyiqembu osekuphele iminyaka lingazuzi izicoco kodwa kula masizini ambalwa edlule ikhombisile ukuba yiqembu elizimisele ngokufaka ukushisa kwamanye amaqembu asembangweni wezicoco.

Nakuba ngesizini edlule yehluleke yancama ukuqeda phakathi kwamaqembu amane aphezezulu kwi-log ye-English Premier League, iqeda endaweni yesishiyagalombili, kodwa indlela esayiqale ngayo le sizini inezimpawu zokuba yiqembu elizimisele ngokwenza kahle ngaphansi komqeqeshi omusha u-Ange Postecoglou.

Emidlalweni eyisikhombisa yePremier League esadlaliwe, iTottenham isanqobe emihlanu yadlala ngokulingana kwemibili, kanti ayikehlulwa. Isendaweni yesibili ngamaphuzu angu-17 ngemuva kweManchester City esaqhwakele phezulu ngamaphuzu angu-18.

Ngeledlule, ibhuquzise iLiverpool ngo 2-1, kowePremier League, iphezulu ngomdlalo, yize iLiverpool iqede umdlalo ingasaphelele umdlali wayo wasesiswini, uCurtis Jones ethola ikhadi elibomvu.

ITottenham inenselelo yokugcina umgqigqo njengoba izobhekana neLuton Town, kowe ligi eKinelworth Road, namuhla ngo-1.30 ntambama.

Nakuba i-Lilywhites - okuyisiteketiso saleli qembu laseLondon - lilahlekelwe yisihlabani somgadli walo uHarry Kane ojoyine iBayern Munich yaseGermany, kodwa umqeqeshi uPostecoglou ngokwesekwa ngusihlalo waleli qembu uDaniel Levy, ukwazile ukungena shi emakethe wasayina abadlali abanohlonze.

Phakathi kwabo kubalwa uBrennan Johnson osuka kwiNottingham Forest, uJames Maddison osuka kwiLeicester City, uDejan Kulusevski osuka kwiJuventus, uGuglielmp Vicario osuka kwi-Empoli, uMicky van van de Ven osuka kwiWolfsburg, nabanye.

UPostecoglou (58) othathe izintambo ku-Antonio Conte, ubhekene nenselelo yokuthatha leli qembu alibeke kwelinye izinga.

Uma ekwazile ukunqobela leli qembu okungenani isicoco esisodwa somkhumulajezi nokulisiza lizibekisele indawo kwi-Uefa Champions League ngesizini ezayo, uyobe wenze umsebenzi oncomekayo.

Ngenkathi kuhamba uKane ngaphambi kokuqala kwale sizini, lo mqeqeshhi ukubeke kwacaca ukuthi ngeke amfune umgadli ozovala isikhala sikaKane ekhona uSon Heung-Min.

Nebala akapholisanga maseko wagixabeza lo mgadli ngebhande likakaputeni.

Imidlalo ye-English Premier League:

Namuhla:

Ngo-1.30pm:

Luton Town v Tottenham Hotspur

Ngo-4pm:

Fulham v Sheffield United; Burnley v Chelsea; Manchester United v Brentford; Everton v Bournemouth

Ngo-6.30pm:

Crystal Palace v Nottingham

Kusasa:

Ngo-3pm:

Brighton v Liverpool; West Ham v Newcastle United; Wolves v Aston Villa

Ngo-5.30pm:

Arsenal v Manchester City