I-Argentina isabambelele eqhulwini ekuklelisweni kweFifa

EMUVA kwemidlalo kanobhutshuzwayo yamazwe ngoSepthemba, i-Argentina isabambelele eqhulwini ekuklelisweni kweFederation of International Football Association (Fifa).

Ompetha bomhlaba badlale imidlalo emithathu ngoSepthemba behlula ngo 1-0 omakhelwane i-Ecuador neBolivia ngo 3-0 beqala eyokuhlunga amazwe angaphansi kweCONMEBOL azodlala kwiWorld Cup ka-2026.

Yilokho okubasize baqhubeka nokuqhoqhobala eqhulwini lamaCocaCola Fifa World Rankings yize bephinde behlulwa ngo 2-1 yiGermany kowokungcweka.

IFrance isaqhubekile nokuyibamba endaweni yesibili kuthi iBrazil ibe kweyesithathu.

I-England iza kweyesine kuthi iBelgium ibe kweyesihlanu nokwenza zingabikhona izinguquko phezulu.

Uhla lwamazwe angu-10 aphezulu, lupheleliswa yiCroatia endaweni yesithupha, yiNetherlands kweyesikhombisa, yiPortugal kweyesishiyagalombili nokuyibo bodwa abami abanombelile kulolu luhlu.

I-Italy nayo kube yiyo yodwa eyehlela endaweni engezansi ngokugudlukela kweyesishiyagalolunye emuva kokubambana ngo 1-1 neNorth Macedonia kweyokuhlungela i-Uefa Euro 2024.

ISpain yiyo evala uhla lwabangu-10 abaphezulu.

**Khonamanjalo, kuvela ukuthi kungenzeka bahlangane enkundleni okungenani okokugcina uLionel Messi wase-Argentina noCristiano Ronaldo wasePortugal.

Imibiko ithi iPortugal ingelinye lamazwe amabili, kubalwa ne-England, azongcweka ne-Argentina ngoMashi wonyaka ozayo.

Lokhu kuthiwa kuyisivumelwano pahakathi kwe-UEFA neCONMEBOL.