Sizohlonipheka kulokhu kwi-Afcon isibalo sabadlali bePSL
U-EDMILSON Dove neqembu lesizwe langakubo eMozambique bazibekisele indawo kwi-Africa Cup of Nations yangonyaka ozayo okungase kwandise isibalo sabadlali bePremier Soccer League kulo mqhudelwano Isithombe: BACKPAGEPIX
KUNEZIMPAWU zokuthi sihlonipheke kulokhu isibalo sabadlali abagijima kwiPremier Soccer League (PSL) abazobe bemele amazwe abo kwi-Africa Cup of Nations (Afcon), ezokuba se-Ivory Coast, ngonyaka ozayo, uma kuqhathaniswa nesango-2022, eCameroon.
Kulokhu okwenza sinyuke isibalo wukuzibekisela kweNingizimu Afrika indawo kwi-Afcon; ilandelwe ngamanye amazwe akhele i-Afrika eseniningizimu, okuyiMozambique, Namibia neZambia okungamazwe anabadlali bePSL abajwayele ukubizwa emaqenjini esizwe.
Kwi-Afcon edlule eCameroon, i-PSL yayimelwe ngabadlali abangu-17 kuphela okwakugqanyiswa nawukuthi iBafana yasala ngaphandle emaqenjini ayedlala.
Ukuzibekisela indawo kwamazwe akhele iNingizimu Afrika kungase kuligqibe leli hlazo kwazise (iBafana iyodwa iza nenqwaba) kanti iMozambique, Namibia neZambia nabo banabo abadlali ababethembayo abagijima emaqenjini esigaba esikhulu sakuleli emaqenjini abo esizwe.
Ukucaca kwamazwe angu-24 azoba ese-Ivory Coast ngoJanuwari, kwethembisile ukuthi i-PSL imeleke kangcono kunokudlule kanti nesizini izobe ihlabe ikhefu lamasonto ayisithupha kusukela ngoDisemba 30 kuze kube uFebhuwari 13.
Abadlali abafana noPeter Shalulile weMamelodi Sundowns, Deon Hotto we-Orlando Pirates, Riaan Hanamub waMaZulu FC noLoyd Kazapua weChippa United, ibona abagqamile kwiNamibia ebe ngelinye lamazwe okugcina ukuzibekisela indawo kwi-Afcon.
KwiMozambique kugqame, u-Edmilson Dove, ongadlali kwiKaizer Chiefs kodwa umqoka kwelakubo kanjalo noManuel Kambala, wePolokwane City.
UGampani Lungu weSuperSport United, Augustine Mulenga weChippa noRally Bwalya, weSekhukhune United basethubeni lokubizwa iZambia.
Bayaqapheleka nabadlali abafana noRichard Ofori, wePirates osanda kubuyiselwa esikwatini seGhana kanti nesitobha seSundowns u-Abdlemounaim Boutouil, sisethubeni lokuqokwa iMorocco, uma eqhubeka nokudlala kahle kwiPSL.
Akucaci noma iNigeria izombiza yini kulokhu uDaniel Akpeyi weMoroka Swallows. Kuleli qembu likaSteve Komphela kukhona noDavid Uromi, waseTanzania nayo engenile esigqokweni.
Amazwe azibekele indawo azoqhathwa ngokwamaqoqo ngo-Okthoba 12.
Esewonke amazwe azobanga isicoco se-Afcon ami kanje:
Nigeria, Guinea-Bissau, Burkina Faso, Cape Verde, Cameroon, Namibia, Egypt, Guinea, Ghana, Angola, Algeria, Tanzania, Mali, Gambia, Zambia, Ivory Coast, DR Congo, Mauritania, Tunisia, Equatorial Guinea, South Africa, Morocco, Senegal neMozambique.