INapoli nenselelo yomgqigqo wangesizini edlule kwiSerie A

UKUNQOBA kweNapoli isicoco seligi yeSerie A okokuqala emuva kweminyaka ewu-33, kube yingqophamlando kubalandeli kwabuyisa ithemba sesiqalo esihle yeqembu lase-Italy.

INapoli yagcina ukunqoba isicoco seligi ngesizini ka-1989/1990, kusagijima izihlabani zakudala okubalwa uDiego Maradona noGianfranco Zola. Ngesizini edlule ka-2022/23 iliqedile ishobolo leminyaka ngokunqoba iSerie A ingcaca, ngegebe lamaphuzu angu-16 phakathi kwayo nezimbangi iLazio, eqede endaweni yesibili.

Ngaphandle kwamava omqeqeshi uLuciano Spalleti, oqophe umlando ngokudla isicoco seligi emuva kweminyaka kukhona amangwevu omgadli ongalibheki ipali uVictor Osimhen, nozakwabo okubalwa uStanislav Lobotka, uKim Min-jae, uGiovanni Di Lorenzo, uKhvicha Kvaratskhelia, noGiacomo Raspadori, aklame indima ekunqobeni kweqembu isicoco seligi.

Nokho, ngenkathi abalandeli be-Azzuri besabungaza ukunqoba kweqembu isicoco seSerie A, kwenzeke abebengakulindele ngenkathi umqeqeshi uSpalleti, eshiya iqembu ngemva kokuqokelwa kwesokuqeqesha iqembu lesizwe lase-Italy, evala isikhala sikaRoberto Mancini okhonjwe indlela, oseqashwe eSaudi Arabia.

Izintambo zathathwa nguRudi Garcia, osuka kwi-Al Nassr yaseSaudi Arabia, osebhekene nenselelo yokuhola iqembu embhidlangweni walo wokuvikela isicoco seSerie A, kule sizini ka-20223/24.

Ngaphandlle kukaMin-jae ojoyine iBayern Munich yaseGermany, iqembu likwazile ukugcina iningi labadlali abamqoka elinqobe nabo isicoco ngesizini edlule, lakwazi ukusayinisa abanye abambalwa abanohlonze.

Phakathi kwabadlali elibasayinisile kubalwa uJens Cajuste osuka kwiStade de Reims yaseFrance, uJesper Lindstrom osuka kwi-Eintrancht Frankfurt yaseGerman, noNatan oyisiqongqwane sasemuva osuka kwiRed Bull Brangantino, yaseBrazil, osayiniselwe ukuvala isikhala sikaMin-jae othathwe yiBayern Munich.

Ukusayina kweqembu abadlali abanohlonze ukuqinisa isikwati nokugcina umgadli obukhali onjengo-Osimhen, obefunwa ngamaqembu ePremier League, uKvaratskhelia, noRaspadori, kuyinkomba yokuthi lizimisele ngokulwela ukuvikela isicoco seSerie A, yize kubukeka kungeke kube lula kule sizini, ngaphansi komqeqeshi omusha uGarcia.

Ngaphandle kwenselelo yokuvikela isicoco seSerie A kule sizini, i-Azzuri inejoka lokwenza kangcono kwi-Uefa Champions League, ngoba ngesizini edlule iphume kuma-quarterfinal ikhishwa yizimbangi, i-AC Milan.

Nokho, iqembu lisayiqale ngonyawo oluhle isizini ka-2023/24 kulandela kokunqoba imidlalo emibili yokuvula ngokubhaxabula iFrosinone ngo 3-1, yalandela ngokushaya iSassuolo ngo 2-0.

No-Osimhen kubukeka esaqhubeka nefomu yakhe yokubhakuzisa inethi njengoba eseshaye amagoli amathathu kule midlalo emibili esadlaliwe.

Izodlala owesithathu weLigi ngokubhekana neLazio, namuhla ngo-8.45 ebusuku, eDieogo Armando Maradona Stadium, eNaples.

Imidlalo yeSerie A:

Namuhla:

Ngo-6.30pm:

Udinese v Frosinone; Bologna v Cagliari

Ngo-8.45pm:

Napoli v Lazio; Atalanta v Monza

Kusasa:

Ngo-6.30pm:

Torino v Genoa; Inter Milan v Fiorentina

Ngo-2.45pm:

Empoli v Juventus; Lecce v Salernitana