Igama likaMessi neBallon d’Or kuhlabana uHaaland

UKUHLABANA kwesilomo seManchester City u-Erling Haaland ngomklomelo we-2023 Uefa Men’s Best Player of the Year, kuvule inkulumompikiswano phakathi kwakhe noLionel Messi embangweni weFifa Best Men’s Player neBallon d’Or.

Emuva kokuqeda isizini edlule eqhwakele ohlwini lwabahlohlimagoli kwi-Uefa ngangu-12, bekungekho ukungabaza ngomdlali obekumele athathe lo mklomelo kwabesilisa.

Amagoli kaHaaland asize iCity yanqoba i-Uefa Champions League okokuqala emlandweni wayo.

Esewonke amagoli abaselwe nguHaaland ngesizini edlule, angu-52 emidlalweni engu-53.

Lawo magoli alekelele ukuthi asize iCity inqobe isicoco seFA Cup ngokunjalo nese-English Premier League.

Iningi lithi ngalokhu, wenze okwanele ukuqokwa njengomdlali ovelele emhlabeni kodwa kukhona abafa noMessi emuva kokuba ngoDisemba esize izwe lakhe, i-Argentina, yanqoba i-2022 Fifa World Cup eQatar.

Kweyamanqamu aseQatar, uMessi ubebhekene noKylian Mbappe waseFrance, owabasela amagoli amathathu kowamanqamu, nokuyivela kancane.

UHaaland ungowaseNorway, ngeshwa, engenawo umlando obambekayo eNdebeni yoMhlaba.

Ngaphambi kokuthatha lo mklomelo, uHaaland uqale wafunda ngokuqhathwa kwezakhe kweyamaqoqo e-Uefa Champions League.

Baqhathwe kwiGroup G neLeipzig, Crvena Zvezda neYoung Boys.