AbeMaritzburg abasabuthi qothu ubuthongo ngekusasa labo

UMDLALI wasemuva kwiMaritzburg United, uLungelo Bhengu, uthi abasabuthi qothu ubuthongo bengabadlali baleli qembu njengoba bedukuza oswini lwenkomo ngekusasa labo kulandela ukugawulwa kwalo yizembe kwiDStv Premiership.

IMaritzburg ebisifana nomuntu ogula engasindi, ishiye abalandeli bayo abebephume ngobuningi bedangele igcina igawulwa yizembe ngokudlala ngokulingana ngo 0-0 neCape Town Spurs, lapho bekudingeka khona inqobe kumnyama kubomvu emdlalweni wokugcina wamaPSL Promotion Play-Offs, ngoLwesithathu olwedlule, eHarry Gwala Stadium, eMgungundlovu.

Ukugawulwa yizembe kweMaritzburg kuholele ekutheni usihlalo wayo, uFarouk Kadodia, akhwele adilike kubadlali ebakhomba ngenjumbane ngokuhlinzela iqembu ezibini emdlalweni walo wokugcina neSpurs. Uphinde wasola namaqhinga omqeqeshi uFadlu Davids, agcine ngokumkhomba indlela.

Njengoba leli qembu laseMphithi lizobe lidlala kwiMotsepe Foundation Championship ngesizini ezayo ka-2023/24, lokhu kusho ukuthi bakhona abadlali elizobachitha ngenhloso yokunciphisa imiholo, njengoba lizokwenza izinguquko ezinqala kusukela kubadlali kuya ethimbeni labaqeqeshi.

“Njengoba ngisekhaya nje, angikalazi ikusasa lami eqenjini, okuyinto engiphatha kabi ngoba izinto zimile, akulaleki kahle nasebusuku. Akumina ngedwa okulesi simo njengoba nabanye ozakwethu engixhumana nabo bebhekene nento efanayo.

Usihlalo (uKadodia) kusukela ngoLwesithathu (bedliwa yizembe) akakakhulumi lutho nathi singabadlali, okuyinto eyenza umuntu angakhululeki. Wonke umuntu usalinde ukuthi abizwe ehhovisi, atshelwe ngekusasa lakhe eqenjini,” kusho uBhengu osenenkontileka neMaritzburg.

UBhengu (24) waseLandskop, eMgungundlovu, okhushulelwe esikimini esikhulu seTeam of Choice ngesizini ka-2019/20, nokho waqala ukuthola ijezi ngesizini ka-2020/21, uthi angakwemukela ukwehla naleli qembu ukuyodlala kwiMotsepe Foundation.

“Kulo mdlalo wokugcina esiwudlale neCape Town Spurs asitshengisanga ukulambela ukubuyela kwiPremiership. Bekumele siwuwine loya mdlalo kodwa sabaphoxa abalandeli bethu abebephume ngobuningi babo ngaleya ndlela ukuzoseseka. Kubuhlungu kakhulu kithi, ikakhulukazi esingabadlali abadabuka eMgungundlovu, ukuhamba kweqembu lasekhaya ngale ndlela.”

Kubukeka amanye amaqembu eseqalile ukuzixebulela umkhomeni kwiTeam of Choice kulandela ukugawulwa kwayo yizembe.

Phakathi kwabadlali asebeshiyile kuleli qembu, kubalwa unozinti uRenalo Learners osanda kusayiniswa yiSekhukhune United, umdlali wasesiswini uWayde Jooste okungacaci uya kuliphi iqembu, nomgadli uMeza okuvela ukuthi usesayine kuMaZulu FC.