Iyahlakazwa iChelsea esiphelelwe yisisu

IYAHLAKAZEKA iChelsea FC, ngoLwesithathu emini okuqinisekiswe ukudayiselana kwayo nompetha base-England nabase-Europe, iManchester City ngenkunzi yenjini yaseCroatia - uMateo Kovacic.

Ngokubika kweSkySports TV, iqembu likaPep Guardiola lizokhokha u-30 million wopondo (R699 million) ngale njini.

UKovacic ulandela enye injini kuN’golo Kante endleleni ephumayo kwiChelsea kwazise naye uqinisekiswe ngoLwesibili ebusuku ekutheni usesayine kwi-Al Ittihad.

Bobabili laba badlali basize iChelsea yawola izicoco kusuka kwiFA Cup, Premier League, Europa League, Champions League kuya kwiClub World Cup.

Eyokuhlakazeka kweChelsea isuka ekutheni phezu kwalaba ababili, ithesun.co.uk ibike ukuthi isinezivumelwano zokudayiswa kukaHakim Ziyech (30), Kalidou Koulibaly (32) no-Eduard Mendy (31) bonke eSaudi Arabia.

IChelsea nokho ishaye idili elizwakalayo ngoKante (32) kwazise kubikwa ukuthi udayiswe ngo-86 million wopondo (R2 billion).

Kusalindelwe kuchitheke inqwaba yabadlali kwiChelsea eyakhiwa kabusha emuva kokuthengwa nguTodd Boehly wase-USA osayinise inqwaba yabadlali ngoJanuwari.

Sizophela sonke isisu seChelsea uma uMason Mount ephelela kwiManchester United, Christian Pulisic noRuben Loftus-Cheek kanti naphambili kubikwa ukuhamba kukaKai Havertz, Calum Hudson-Odoi noPierre-Emerick Aubameyang.

*Khonamanjalo, iChelsea iqinisekise ukusyainisa umdlali waphambili waseFrance obedlala kwiRP Leipzig, uChristopher Nkunku. ngo 52 million wopondo (R1.2 billion). -Malibongwe Mdletshe