AmaZulu nejoka lokubuyisa isithunzi ngeSwallows

UKUNQANYULWA kwezinkontileka zabadlali bamaMaZulu FC, okuqale isizini bebalwa nezethenjwa, kufakazela izinsolo zokuthi bebengadlelani kahle nomqeqeshi uRomain ‘Fohloza’ Folz.

Phakathi kwabadlali abebethathwa njengezethenjwa kubalwa isitobha uRamahlwe Mphahlele, nenjini uKeagan Buchanan. Kusolakala ukuthi bebengahoshelani kahle abadlali asebekhulile noFohloza, njengoba lo mqeqeshi ophuma eFrance, emncane kunabo bonke emaqenjini awu-16 eDStv Premiership.

Ngonyaka odlule uFolz, uqashwe yiqembu elinomlando obambekayo kwezikanobhutshuzwayo wakuleli, ngenkontileka ebiphela kule sizini.

Ezinyangeni ezimbili ezedlule kwenzeke obekungalindelekile, enikezwa inkontileka entsha yeminyaka emithathu. Basala bekhexile abathandi bebhola bezibuza ukuthi, welulelwe isivumelwano ngasiphi isizathu?

Lokhu kulandelwe esikhulu isililo sabahlaziyi bomdlalo kanobhutshuzwayo bekhala ngokuthi uFolz (32), akakawubambi umgqigqo webhola lakuleli.

Nebala, emidlalweni ewu-14 yeligi ekuMaZulu, uFolz usanqobe emithathu kuphela. Kanti ngaphambi kwekhefu unqunywe ngezikaSteve Barker iStellenbosch FC ngo 2-0, eKapa.

Namuhla ngo-8 ebusuku unethuba lokubuyisa ukuzethemba kweqembu ngokuthi alihola linqobe iSwallows koweDStv Premiership, eMoses Mabhida Stadium, eThekwini.

Okubeka uFolz nezakhe ethubeni lokubuyisa isithunzi ngeSwallows wukuthi babhekene neqembu abanerekhodi elihle kulo, okungenani uma ubheka ukuthi balehlulile emidlalweni emibili yakamuva yeligi.

Empeleni selokhu ishaye ibuya kwiPremiership iSwallows, ayikaze iwehlule AmaZulu. Emlenzeni wokuqala wesizini, iqembu laseThekwini, libuye namaphuzu agcwele eDobsonville linqoba ngo 3-2.

AmaZulu aya kulo mdlalo eqhele ngamaphuzu ayisikhombisa esiyingini sezembe ngoba ayibambe endaweni ka-10 ngangu-28 kanti iMaritzburg United, esendaweni ka-15 ino-21.

Ukunqoba koSuthu namuhla kuzonika abadlali bakaFolz ukuzethemba abakudingayo nokugxila ekulweleni ukuqeda emaqenjini ayisishiyagalombili aphezulu ngokunjalo namane okuqala.

Angu-21 amaphuzu asazobangwa wuSuthu nokusho ukuthi asengaqeda namaphuzu angu-49 uma engayinqoba yonke imidlalo esele.

ISwallows isalwela ukusinda ezembeni kwazise isendaweni ka-14 ngamaphuzu angu-23.

Imidlalo yeDStv Premiership-

Namuhla: Richards Bay v Orlando Pirates eKing Zwelithini ngo-3pm; Chippa Utd v SuperSport Utd eNelson Mandela Bay ngo-5.30pm; Kaizer Chiefs v Stellenbosch eFNB Stadium ngo-5.30pm.

Kusasa: Golden Arrows v Sekhukhune Utd ngo-3pm; TS Galaxy v Maritzburg Utd eMbombela Stadium ngo-5.30pm.