UVan Wyk uphoxekile esala ngaphandle kwiBanyana

SMISO MSOMI

OWAYENGUKAPUTENI weBanyana Banyana, uJanine van Wyk usezwakalise ukudumala kwakhe ngokushiywa ngaphandle esikwatini saleli qembu lesizwe esisanda kumenyezelwa esizodlala owobungani neSerbia ngenyanga ezayo.

UVan Wyk (35) unemidlalo eminingi eqenjini lesizwe lakuleli njengoba eselimele izikhawu eziwu-180 futhi nguyena owesifazane onemidlalo eminingi kwelesizwe e-Afrika.

Ngemuva kokudlala isikhashana eScotland kwiGlasgow City nyakenye, uVan Wyk manje useyibamba eqenjini laseGreece, i-Ergotelis Women FC. Yize esathenjwa yila maqembu aphesheya kodwa ezinyangeni ezedlule ukuthole kunzima ukudonsa iso lomqeqeshi weBanyana Banyana, eDesiree Ellis.

Lo mdlali oyibamba emuva ubekhona elakuleli linqoba i-Women Africa Cup of Nations (Wafcon) nyakenye, okulinikeze ithikithi lokudlala kwiNdebe yoMhlaba ekulo nyaka ezoba se-Australia naseNew Zealand ngoJulayi.

Njengoba iBanyana iqhubeka namalungiselelo alo mqhudelwano, uVan Wyk, ungomunye wabadlali abanqobe i-Wafcon abazithola beshiywa ngaphandle. Ubengekho nangenyanga edlule ngesikhathi iqembu lidlala emqhudelwaneni wabesifazane obuseTurkey.

UVan Wyk uveze ukuphoxeka kwakhe ngempelasonto ebhala ekhasini lakhe le-Twitter ku-@Janinevanwyk5, kodwa wathi uzoqhubeka nokusebenza ngokuzimisela.

“Ngiphoxekile ngokungafakwa esikwatini kule midlalo edlule kodwa ngizoqhubeka nokusebenza ngokuzimisela ngenzela ukuthi uma kwenzeka ngidingeka. Ngifisela @Banyana_Banyana konke okuhle emdlalweni wayo wobungani neSerbia njengoba beqhubeka namalungiselelo eNdebe yoMhlaba,” ubhale kanje uVan Wyk.

U-Ellis ukuvezile ukuthi akawuvalile umnyango ku-Van Wyk, egcizelela ukubaluleka kokuhlanganisa abadlali abasangamaklume nalabo asebemnkantshubomvu eqenjini lakhe leNdebe yoMhlaba.

“Ngibheke abadlali abazoletha okuthile eqenjini, ngibheke abadlali abangakalitholi ithuba kodwa njengoba ngike ngasho, umnyango awuvaliwe (ngokubuyela kukaVan Wyk),” kusho u-Ellis.

Lo mqeqeshi uncome uVan Wyk ngakwenzile eminyakeni edlule egcizelela ukuthi isinqumo sakhe nesinye sabadlali sokuya phesheya kusiza iBanyana.

“UJanine udlale indima enkulu ebholeni labesifazane eNingizimu Afrika ngeqembu lakhe i-JVW naye uqobo. Abadlali abasebancane babukela kuyena,” kusho u-Ellis.

IJVW ingelinye lamaqembu enza kahle kwiHollywoodbets Super League. Omunye umdlali ongalibonanga elidlalayo eqenjini elizobhekana neSerbia, ULebohang Ramalepe ohlale izinyanga ezintathu engenalo iqembu. Usanda kujoyina iMamelodi Sundowns Ladies kwiSuper League. Ubuyile eqenjini uNomvula Kgoale, naye owayeseqenjini leWafcon. Useqale imidlalo emihlanu selokhu asayiniswa yiTS Galaxy Queens ekuqaleni kwesizini yeSuper League.