AwaKwaZulu-Natal nenselelo yokuqeda ishobolo leNedbank Cup

NAKULO nyaka iningi elilandela unobhutshuzwayo likubheke ngabomvu ukuthi ngabe amaqembu aKwaZulu-Natal azogcina ekwazile na, ukuqeda ishobolo lokuhluleka ukuzuza inkomishi yeNedbank Cup selokhu yasungulwa.

Kumaqembu amahlanu akulesi sifundazwe, kule sizini mathathu akwaze ukudlulela kwiLast 16.

AmaZulu aqhathwe neDondol Stars yaseMamelodi edlala kwiGauteng ABC Motsepe League. IDondolo imangaze abaningi idlula kwiSuperSport Unted.

USuthu luphume ngembobo yenaliti kwiTornado edlala kwiMotsepe League waseNothern Cape.

Kowomkhaya, iLamontville Golden Arrows iqhathwe noRoyal AM. ABafana Be'sthende badlule kwiPretoria Callies, iThwihli Thwahla yashaya ngengciciyela iCape Town City.

Empeleni sekuphele iminyaka ewu-52 amaqembu aKwaZulu-Natal ehluleka ukuphakamisa le nkomishi okuyiKaizer Chiefs eseyiyinqobe kaningi. Iyiphakamise kayi-13.

Nakuba kushayisa ngamahloni nakwezinye izinkomishi kodwa uSuthu selwake lwayinqoba iCoca Cola Cup ngo-1992, luphekwa uClive " The Dog" Barker.

Kulandele iManning Rangers eyaphakamise eseligi ngesizini yokuqala ka-1996/97. Beyicijwa uGordon Igesund.

Kuvale ngoManqoba "TV" Mngqithi onqobe eseMTN8 ne-Arrows ngo-2009.

INedbank isungulwa ngo-1971, yaqale yabizwa ngeLife Challenge Cup. Kulandele igama leBenson and Hedges Trophy ngo-1976. Lokhu kukhomba ukuthi sekuphele iminyaka ewu-52 lapha kwelikaMthaniya le ndebe idlula ngaphandle.

Ngo-1978 kuqhamuke eleMainstay Cup neleBob Save Super Bowl ngo-1988.

Ngo-2001 lo mqhudelwano ube sewuqanjwa nge-Absa Cup ngaphambi kokuthi uxhaswe ngabebhange iNedbank ngo-2008.

Emaqenjini aKwaZulu-Natal ngaMaZulu okumele ukube ngabe kade awunqoba lo mqhudelwano. Asefinyelele amahlandla ayisithupha kowamanqamu awo.

Usabizwa ngeLife Challenge angene kowamanqamu kathathu eshaywa yiKaizer Chiefs ngo-1972 ne-Orlando Pirates ngo-1973 nango-1974.

Usuxhaswe yinkampani yotshwala iMainstay, aphinde ashaywa yiwo AmaKhosi ngo-1987. Sewethiwe eleBob Save, ezikaSandile Zungu osengusihlalo wenyoka eluhlazana, ziphinde zaqunjwa phansi yiJomo Cosmos ngo-1990.

Ngesizini ka-2009/10 uSuthu luyeke elinye ithuba luphucwa iqatha emlonyeni, yiBidvest Wits.

UZungu usanda kutshela leli phephandaba ukuthi wethemba ukuthi ukufinyelela kwabo kowamanqamu e-MTN8 ngonyaka odlule kuzoliqeda ishobolo le Nedbank.

I-African Wanderers ingelinye iqembu elifinyelelile kowanqamu eNedbank ngo-1982 nango-1985, lo mqhudelwano useyiMainstay Cup. Ishaywe yiChiefs neBloemfontein Celtic.

Sewaziwa nge-Absa Cup, ngo-2004 , iRangers idliwe yiSwallows. KwawaKwaZulu-Natal eligcine ukungena kowamanqamu yiMaritzburg United eshaywe yiFree State Stars ngeka-2017-18.

Emqhudelwaneni wesizini ka-2021-22, ezikaShauwn "MaMkhize" Mkhize zizamile njengoba zikhishwe yiMamelodi Sundowns kowandulela owamanqamu.

Umhlanganiso ugcine udliwe yiwo amaBrazillians eshaya eMarumo Gallants ngo-2-1. USuthu ne-Arrows bakhishwa zisuka kwiLast 32 ngesizini edlule .