Kuzojabula oweBafana ngoTau koweFifa
UMGADLI weBafana Bafana, uPercy Tau, okuhlalelwe ethembeni lokuthi abe nomqhudelwano omuhle neqembu lakhe i-Al Ahly kwi-2023 Fifa Club World Cup Isithombe: BACKPAGEPIX
KUZOJABULA umqeqeshi weBafana Bafana, uHugo Broos, ngesilomo somdlali wakhe, uPercy Tau, ozothola okokuqala ithuba kwiFifa Club World Cup eqhatha ompetha bamazwekazi.
UTau (28), oyibamba phambili kwi Al-Ahly, akadlalanga kulo mqhudelwano naleli qembu lakhe lase-Egypt, nyakenye, ngenxa yokulimala.
Kuke kwabanjwa umoya ngesikhathi ephinde edonseka umsipha osethangeni ngoDisemba, nyakenye.
Ubuyele enkundleni bebhekene neNational Bank of Egypt ngesonto eledlule, eqhamuka ebhentshini ngomzuzu ka-63.
I-Al Ahly izovula lo mqhudelwano ne-Auckland City yaseNew Zealand emzuliswaneni wokuqala emdlalweni ozobanjelwa e-Ibn Batouta Stadium, edolobheni iTangier, eMorocco, ngo-9 kusihlwa.
Iqembu elizonqoba lo mdlalo lizodudulana neqembu lase-United States, iSeattle Sounders, emzuliswaneni wesibili ngoMgqibelo.
Nakuba iRed Devils ingebona ompetha base-Afrika, emuva kokudliwa yiWydad AC kowamanqamu eCaf Champions League ngonyaka owedlule, ifakiwe kulo mqhudelwano ngenxa yokuthi iWydad ibivele isizoba ngosokhaya.
I-Ahly ecijwa nguMarcel Koller waseSwitzerland, ibhekwe ukwenza kangcono kulo nyaka ngemuva kokunqoba izindondo zethusi kabili icijwa nguPitso Mosimane.
“Abadlali abaseqenjini njengamanje banesipiliyoni ngenxa yokudlala kabili kulo mqhudelwano. Kuzobe kungokwesishiyagalombili i-Al Ahly ibamba iqhaza kulo mqhudelwano ohlonishwayo,” kusho isitobha u-Ayman Ashraf kwi-website yeqembu.
"Sonke siphupha ngokubhekana namaqembu amakhulu njengeReal Madrid. Lo mqhudelwano usibeka ethubeni lokuthi sibhekane nelinye lamaqembu amakhulu e-Europe nasemhlabeni. Nokho-ke kusesekuseni ukukhuluma ngalo mdlalo njengamanje. Okwamanje sisagxile emdlalweni wethu ne-Auckland City FC. Silungiselele kahle kakhulu umdlalo futhi sihlose ukuwunqoba ukuze sijabulise abalandeli bethu."
I-Al Ahly iqhwakele kwi-Egyptian Premier League ngamaphuzu angu-37 emidlalweni engu-15. Isinqobe imidlalo engu-11, yadlala ngokulingana kwemine.
I-Auckland City engompetha be-Oceania Football Confederation, yahoxa kulo mqhudelwano ngonyaka odlule ngenxa yokuqina kwemithetho yokugwema ukubhebhetheka kobhubhane lwe-Covid 19 eNew Zealand.
Selokhu yagcina ukudlala umdlalo osemthethweni ngoDisemba 4, ibhekene neWellington Olympic emdlalweni wokugcina wesizini weNations League ka-2022.