IJuventus enkingeni ngezilomo iphucwa amaphuzu

IJUVENTUS, elinye lamaqembu amakhulu kwi-Italian Serie A, ingase izithole senkingeni yokugcina izilomo zabadlali bayo emuva kokuphucwa amaphuzu angu-15 kwilog ngoLwesihlanu.

Lesi sigwebo, esiyehlisele endaweni ka-10 kwilog, isithole emuva kokushushiswa ngezinsolo zokuqamba amanga ngemali ebiyenza njengenzuzo.

Lokhu kuyibeka engozini yokungayidlali i-Uefa Champions League ngesizini ezayo nokuzokwenza kube nzima ukugcina izilomo okubalwa kuzo uFederico Chiesa odlala ezimpondweni.

Kubalwa nabadlali abafana noPaul Pogba, eyokudayiswa kwakhe kwiManchester United, okungudaba lwezinganekwane.

Kuthiwa ibibizisa ngokweqile abadlali ebibadayisa iphinde ibike ububha ithi ayenzu nzuzo, ukunalokho ilahlekelwa yimali.

Abanye abathintekayo kulesi sigwebo nguFabio Paratici, oseyinhloko yezokuthengwa nokudayiswa kwabadlali kwiTottenham Hotspur yase-England.

IJuventus nezikhulu ezithintekayo bayaliphika icala kanti bonke bayavumelana ukuthi bazolidlulisela phambili kwi-Italian Olympic Committee (CONI) ngenhloso yokuguqula isigwebo.

ICONI ayinawo amandla okuguqula isigwebo kodwa inawo awokuvumela noma ukuphikisa isiphetho sodaba.

Kuvela ukuthi ngesizini edlule iJuventus ibike ukulahlekelwa yinzuzo engu-R4.7 billion nokuyirekhodi.

Akuqali ukuthi iJuventus iphucwe amaphuzu kwazise ngo-2006 yaphucwa isicoco seSerie A, yehliselwa kwiSerie B ilahlwa wubufakazi obavela kwiCalciopoli Scandal lapho yayisolwa ngokugqongoza ekudayisweni kwemidlalo ngokufunzelela ukuqokwa konondweba ababezovuna yona