IChelsea ihlule iMan United ne-Arsenal ngoFelix

ICHESLEA idlule izimbangi ze-English Premier League, iManchester United ne-Arsenal, ekusayiniseni isibabuli sasePortugal, uJoao Felix obolekwe kwi-Atletico Madrid kuze kuphele isizini.

Lo mdlali obeyibambe esikwatini sePortugal esiphume kuma-quarterinal e-2022 Fifa World Cup, ungowesine kwasebesayiniswe yiCheslea kuleli windi likaJanuwari lokuhwebelana ngabadlali.

Ulandela uBenoit Badiashile, David Datro Fofana noAndrey Santos.

Felix training with the team. (@ChelseaFC - 5th stand app) #CFC pic.twitter.com/jLxy1g2MyZ

— ChelseaFC365 (@CFC365Official) January 11, 2023

Ngokubika kweSkpySports.com, okwenze i-Atletico yamdedela uFelix, wukungaboningasolinye phakathi kwakhe nomqeqeshi uDiego Simeone.

IChelsea, ebhinjelwa wuhlelo ngemiphumela kulezi zinsuku ngaphansi komqeqeshi uGraham Potter, ibimbanga ne-Arsenal neMan United uFelix.

Kuvela ukuthi lezi zimbangi zeChelsea zibe manqika ukukhokha u-11 wama-euro (loan fee - R 200 million) ofunwe yi-Atletico ngokubolekisa lo mdlali.

Inkulumo kaPotter ngoFelix ongachithanga sikhathi ukuqala ukuziqeqesha neqembu, ikhomba ukuthi angase abonakale okokuqala uma iBlues isibhekene neFulham koweligi ngoLwesine ebusuku.

“Ungumdlali weqophelo ongenza umehluko omkhulu ekuhlaseleni kwethu. Usemncane kodwa unamava abambekayo,” kusho uPotter kwiskysport.com.

“Kuhle ukuthi sibe naye namuhla azilolonge. Sizombona ukuthi angadlala yini ngoLwesine. Uqatha ngokwanele kodwa sekungaba yikho-ke ukuthi usanda kusuka kwelinye iqembu.”

Umdlalo womkhaya basentshonalanga yeLondon, Fulham neChelsea, ungo-10 ebusuku.

IChelsea igcine ukunqoba umdlalo ngo-Okthoba nokuyibeka kunombolo-10 kwilog lapho esele khona ngamaphuzu angu-19 kwi-Arsenal esesicongweni.