EzikaMaMkhize zibheke ukuvuka ngeCity eKapa

SITHEMBISO MKHIZE

UMQEQESHI weRoyal AM, u-Abram Nteo, uthi ukuya kwikhefu leNdebe yoMhlaba beshaya ngenothi eliphansi kubaphoqa ukunqoba kumnyama kubomvu kwiCape Town City, abazobhekana nayo koweDStv Premiership ngoLwesihlanu ngo-5.30 ntambama, eCape Town Stadium.

Ngaphambi kokuya ekhefini, leli qembu likaShaun "MaMkhize" Mkhize likhishwe yiTP Mazembe yaseDemocratic Republic of Congo (DRC) kwiCaf Confederation Cup. Bekuyimidlalo yokuhlungela ukungena esigabeni samaqoqo.

Ngaphambi kokuya kule midlalo, belibhaxatshulwe yiMamelodi Sundowns koweDStv Premiership.

Lokhu kuholele ekutheni iThwihli Thwahla iye ekhefini isendaweni yesishiyagalolunye ngamaphuzu awu-16, emidlalweni ewu-12.

UNteo okunguye obehleli ebhentshini emidlalweni yeConfederation Cup, uveze ukuthi leli khefu libasize kakhulu.

Uthe bathole ithuba lokudlala eyobungani ebenezithelo ezinhle.

"Kuningi okuhle engikubone kule midlalo yobungani. Sithole ithuba lokuzilungiselela umdlalo weCity amasonto amathathu kuya kwamane. Abafana bayazi ukuthi sifunani njengabaqeqeshi. Bazi kahle ukuthi isimo sethu kasisihle kwi-log. Siye ekhefini izinto zingasihambeli kahle. Lokhu kusiphoqa ukuthi sibuye namaphuzu amathathu eCape Town. Ngethemba nokuthi nabalandeli bethu abaseCape Town bazophuma ngobuningi babo ukuzoseseka," kubeka uNteo.

Ngaphandle komdlalo weCity, enyangeni kaJanuwari, iThwihli Thwahla izodlala emihlanu. Izodlala neTS Galaxy (Januwari 3), ibhekane naMaZulu (Januwari 8), ivakashele iMaritzburg United (Januwari 15), yamukele iChippa United (Januwari 21) bese ivala inyanga neKaizer Chiefs (Januwari 29) ekuhambeni.

"Isimo sisazoba nzima, sekusele nemidlalo embalwa bese singena emzuliswaneni wesibili. Abafana bethu bayazi ukuthi ngoJanuwari sinesibalo esithile samaphuzu okumele siwaqoqe. Ekupheleni kwesizini kumele siqede kwi-Top 4 noma emaqenjini amahlanu aphezulu. Uma sizohluleka ukunqoba ngeke sikwazi ukufeza leli phupho. Nginethemba lokuthi kusukela koweCity sizonqoba," kusho uNteo obambisene noKhabo Zondo kulo msebenzi.

Ngesifanayo nakumaCitizens, aye ekhefini ekhishwe yi-UMS Alger yase-Algeria kwiConfederation. Ngaphambi kwalokhu kuwashiswa ijezi, kwiligi abeshaywe yiMarumo Gallants. Asendaweni yesi-13, ngamaphuzu awu-13, emidlalweni ewu-12.