Abadlali bakudala abafisi uZuma ashaywe induku eyabashaya

UZuma (26) odabuka eMbali, eMgungundlovu, usegcine ephumelelile ukufaka igama lakhe ohlwini lwabadlali abakhonze impilo yobumnandi basebusuku ehambisana nophuzo oludakayo.

Kuyimanje umisiwe ekuzihlanganiseni nezinto ezithinta Amakhosi kuze kube utholwa yikomiti leqembu eliqondisa ubugwegwe engenacala.

Emasontweni edlule iChiefs ikhiphe isitatimende esithi lo mdlali umisiwe ngemuva kokwephula umthetho weqembu wokuziphatha.

Imibiko ithi ngemuva kokuba eshaye igoli emdlalweni abadliwa kuwo iCape Town City ngo-2-1, emasontweni adlule, wabe eseya kobudlonya, wafika ejimini ngakusasa esesimeni esingagculisi.

Kwenzeka lokhu nje, ngoNovemba nyakenye, wamiswa iqembu ngemuva kokubanjwa abakwasidlodlo eshayela imoto ebukhile. IChiefs yabe isimyisa esikhungweni sokuhlumelelisa izimilo.

UKhanye owazakhela udumo kwiChiefs nowasheshe waliyeka ibhola ngenxa yokuzifela ngezinkamba zikaFaro, uthe uZuma akayeke ubumnandi ngoba sesisondele isikhathi sokuthi azisole.

"Utshwala abuyisani ndawo, uzozisola uDumisani. Akasebenzise leli thuba alinikiwe. Baningi abadlali abanekhono njengaye kodwa abalitholanga ithuba lokudlala kwiChiefs. Phela uma sikhuluma iqiniso akakayenzeli lutho iChiefs. Uma kwenzeka manje kuphela ngekusasa lakhe akukho ayokhunjulwa ngakho ebholeni lakuleli. Lobu bukhazikhazi akubo buyashesha ukuphela," kubeka uKhanye.

Uqhube ngokuthi: "Ngakolunye uhlangothi, ngokubona kwami, lo mfana ushaywa izinto zamadlozi nemimoya. Ngokwami iChiefs kumele ingamxoshi kodwa imsize. Unekhono eliyisimanga. Ube nebhadi esikhathini esiningi wadlala ngaphansi kwabaqeqeshi abangakholelwa kuye. Kodwa uma enikiwe ithuba wenza izimanga. Wenza le mihlola nje, u-Arthur (Zwane) ubezama ukumnika ithuba. Kuyikho nje ukuthi kangimjwayele. Bengizoya kuye ngimtshele ngosizi engibhekane nalo ngenxa yotshwala. Noma engasezanga kimina angaya nakwabanye abafana noLerato Chabangu nabanye ikusasa labo elibulawe utshwala.“

UNdlovu owazakhela igama kumaqembu afana neBloemfontein Celtic, Mamelodi Sundowns nongumkhaya kaZuma eMphithi, utshele Isolezwe ukuthi kubuhlungu ngoba lo mdlali umazi esemncane.

Uthe esakhula wayedlalela iqembu lomkakhe elalaziwa ngoCoco FC. Uthe umazi ewumfana olungile.

"Nami ngezikhathi zami, ngike ngangena otshwaleni. Ngayeka ibhola ngisemncane ngenxa yabo. Abadlali bayakhohlisana, bambalwa abatshelana iqiniso,“ kusho uNdlovu.

“Nami lolu nyanyavu lwezimoto abalugibelayo labafana namabhodlela abawaphuzayo ngadlula kukona. Akwenzelani lutho. Kubuhlungu uma ngibona umfana okhulele phambi kwami eya ngokushona emgodini. Ngimthanda kabi lo mfana, unekusasa elihle. Inkinga ngabo bahambela kude nathi esibadala. Njengoba kuzovalwa isizini ngicela uZuma nabanye balapha eMphithi ke badilike bazoxoxa nathi esibadala. Asifune mali yabo kodwa sifuna ukubaqwashisa," kubeka uNdlovu.