Kuvuliwe ukuvotelwa kwezikwati zeDStv Compact Cup

SEKUVULIWE ukuvotelwa kwabazodlala emqhudelwaneni omusha wePremier Soccer League (PSL), iDStv Compact Cup.

Abalandeli kumele bavotele abadlali bamaqembu agijima kwiDStv Premiership abafuna ukubabona bakhe izikwati ezizogijima kulo mqhudelwano ngoJanuwari.

Ngesikhathi wethulwa ngesonto eledlule, usihlalo wePSL, u-Irvin Khoza, waveza ukuthi uzobangwa yizikwati ezine ezizobe zihlanganise abadlali bamaqembu ahlukene agijima kwiDStv Premiership.

Iqembu leCoastal 1 lizohlanganisa abadlali baMaZulu, Lamontville Golden Arrows, Royal AM neMaritzburg United. Abadlali abavela kwiChippa United, Cape Town City, Stellenbosch FC neBaroka bazokwakha iqembu leCostal 2.

Abadlali bamaqembu aseSoweto, iKaizer Chiefs, i-Orlando Pirates neSwallows, bazohlanganiswa nabeTS Galaxy ukwakha iqembu le-Inland 1. Iqembu le-Inland 2 lizobunjwa ngabadlali beMamelodi Sundowns, SuperSport United, Sekhukhune United neMarumo Gallants.

Bonke abadlali, abangeke babambe iqhaza kwi-Africa Cup of Nations ezobe iseCameroon (ngoJanuwari), bazoba sethubeni lokuqokwa.

Uma sezikhethiwe izikwati, kuzoqalwa ngemidlalo eyandulela owamanqamu emibili ngoJanuwari 22. Amaqembu azonqoba azobe esedudulana kowamanqamu ngoJanuwari 29 kuthi lawo ahluliwe abange indawo yesithathu ngosuku olufanayo.

Abalandeli abafisa ukuvota bangashaya u-*120*830# noma bangene ku- https://supersport.com/dstvcompactcup.

Iqembu ngalinye kuthiwa kumele libe okungenani nabadlali abayisishiyagalombili basemuva, isibalo esilinganayo sabadlala esiswini bese kuba abagadli abane nonozinti ababili. Iqembu ngalinye kumele libe nabadlali abawu-26.

Ukuvalwa kokuvotwa kungoJanuwari 3. NgoJanuwari 5 kuzoba nomcimbi wokuqhathwa kwamaqembu bese kubekwa nabaqeqeshi abane namaphini abo.