Senyukile isibalo sabahaqwe yiCovid-19 kwiChiefs
IKAIZER Chiefs isiphumele obala yathi ngeke ize iwudlale owayo neLamontville Golden Arrows weDStv Premiership okumele ube ngoLwesithathu ePrincess Magogo ngo-7.30 ntambama Isithombe: BACKPAGEPIX
I-KAIZER Chiefs ngeke iye eThekwini emdlalweni weDStv Premiership okumele iwudlale neLamontville Golden Arrows kusasa ePrincess Magogo Stadium ngo-7.30 ebusuku.
Leli qembu likuveze lokhu esitatimendeni esishicilelwe kwi-website yeqembu namuhla ntambama. Ibeke isizathu sokwenya kwesibalo sabatheleleke nge-Covid-19 eqenjini. Sisuke kwabawu-31 ngesonto eledlule kwathi ngemuva kokuhlolwa namuhla, kwavela abanye abahlanu asebenaleli gciwane.
Ngempelasonto edlule, iChiefs ayifikanga emdlalweni weligi obekumele iwudlale neCape Town City eFNB Stadium. Kulindeleke ukuth iPremier Soccer League (PSL) ikhiphe isinqumo ngalokhu njengoba iCity yona yatheleka enkundleni kanjalo nabaphathi bomdlalo.
“Ngemuva kokuxhumana nethimba lethu lodokotela nabaphathi ngesimo sokuqubuka kwe-Covid-19 okwenzeke eKaizer Chiefs Village ngesonto eledlule, iKaizer Chief angeke ikwazi ukuhamba iye emdlalweni wangoLwesithathu, uDisemba 8, ePrincess Magogo Stadium, eThekwini,” siqala kanje isitatimende saMakhosi.
Leli qembu liveze ukuthi lisalindele impendulo ngesinqumo esithathwe yiPSL ngesicelo sayo sokuhlehliselwa imidlalo kaDisemba.
“Isikwati sabadlali sesiqalile ukulandela imigomo ehambisana nokubuya (ekuziqeqesheni) namuhla. Emizameni yokugcina iVillage iphephile ngokwanele ukuthi ivulwe ngokushesha, iqembu liphinde lahlola bonke abadlali beqembu elikhulu nabamajuniya, ithimba labaqeqeshi nabanye abasebenzi ngoMsombuluko ekuseni. Okubuhlungu wukuthi imiphumela iveze ukuthi ukuqubuka kwegciwane obekuholele ekutheni iKaizer Chiefs ifake isicelo sokuhlehla kwemidlalo, selimane labhebhetheka ekhempini, kunabantu abahlanu atholwe nalo, okwenza isibalo sinyukele kwabawu-36,” kuqhuba isitatimende.
IChiefs igcizelele ukuthi ekwenzeyo kuhambisana nemigomo yoMnyango wezeMpilo kazwelonke yokunqanda ukubhebhetheka kweCovid-19.
“Lokhu kukhombisa ukuthi kungani kusemqoka ukuthi iqembu likugweme ukuxhumana nabanye njengoba lokho kungadala ukuthi lolu bhubhane lungaphumi ngaphandle kweqembu okungaba yisimo esibi kubona bonke abathintekayo.
“Kusemahlombe ethu ukuzama ukunqanda ukutheleleka futhi sisindise nempilo njengoba abadlali nabasebenzi kumele kunemindeni okumele babuyele kuyona nsuku zonke,” kusho udokotela weChiefs uHashendra Ramjee.
Baveze ukuthi kukhona abazophuma kumvalelandlini kulezi zinsuku ezizayo. Kodwa isitatimende sigcizelele ukuthi abadlali ababuyayo kuzomele batotobiswe ukuze babuyele esimeni esiqatha ukuthi bangadlala.
Sivale ngokuthi iChiefs ayisoze yadlala ngabantu abaphethwe yiCovid-19.
“Kumele kuqapheleke ukuthi iKaizer Chiefs ayikaze phambilini futhi ayisoze idlale ngabantu abatheleleke ngeCovid-19. Ngeke futhi sibeke izikhamuzi zezwe engcupheni ngokuthi sindize siye kwesinye isifundazwe sisuka esifundazweni esinezibalo eziphezulu zabathelelekile. Sinxusa ukuziphatha okufanele nokuthi abaholi babhekane nalolu bhubhane nelesi simo esingajwayelekile.”