I-TUT inciphise igebe leSundowns Ladies kwi-Super League

XOLILE MPISANE

YEHLISE igebe leMamelodi Sundowns laba ngamaphuzu amane i-TUT ngesikhathi ihlula i-UWC ngo 2-0 emdlalweni weHollywoodbets Super League obuse UWC Stadium ngempelasonto.

Amagoli ashaywe nguKoketso Tlailane noTiisetso Makhubela ngesiwombe sokuqala. Yize noma i-UWC izamile ukubuya ngesiwombe sesibili izivakashi besezivale ngci emuva.

I-TUT isendaweni yesibili ngamaphuzu angu-30. ISundowns eyibambe emidlalweni yeCosafa yokuhlungela iCaf Champions League, isazihola phambili ngamaphuzu angu-34. Nokho i-TUT isihamba phambili ngemidlalo emibili kuneSundowns.

I-UWC ibiqala ukushayelwa ekhaya kule sizini, isisendaweni yesine kwi-log ngamaphuzu angu-28 emuva kwemidlalo engu-14.

I-JVW ikhuphukele endaweni yesithathu kwi-log ihlula iMa-Indies ngo 2-0 eTsakane Stadium. Amagoli womabili ashaywe ngukaputeni uNompumelelo Nyandeni.

Uyena osebahola phambili ngokuhlohla amagoli njengoba esevalele angu-13 selokhu iqalile isizini. Ulandelwa nguNthabiseng Majiya weRichmond United osenamagoli angu-12 no-Andisiwe Mgcoyi weSundowns onangu-10.

Umqeqeshi weJVW uCiara Picco, uthe bekumqoka ukuthi baqoqe amaphuzu aphelele kule mpelasonto ukuze basondele emaqenjini angaphezulu kwabo.

"Besizitshelile ukuthi nakanjani kumele siwaqoqe amaphuzu amathathu ngenxa yokuthi amaqembu abengaphezulu kwethu, i-UWC ne-TUT, abedlala womabili. Ukunqoba kwe-TUT kulowo mdlalo kusinike ithuba lokukhuphuka kwi-log," kusho uPicco.

"Umdlalo ubulukhuni kodwa okubalulekile ukuthi sikwazile ukushaya amagoli saqeda savala emuva. Umdlalo ubunzima kakhulu ngoba iMa-Indies iqembu okungelula ukuqagela kukuthi lizodlala kanjani.

"Besicabanga ukuthi ngalesi sikhathi sesizini abalandeli bazobe sebebuyile, kulukhuni ukudlala bengekho ezinkundleni kodwa sizoqhubeka nokuzimisela baze babuye."

Iqembu laseThekwini iDurban Ladies liphinde labuya lingaphethe lutho ngemuva kokushaywa iThunderbirds Ladies ngo 1-0 eChatsworth Stadium. Igoli kulo mdlalo lishaywe nguZimasa Dekeda.

Emuva kokunqoba imidlalo emine ilandelana ngaphambi kokumiswa kwemidlalo yeSuper League ngoJulayi ngenxa yeCovid-19, iDurban Ladies ayikabuyeli efomini yayo. Emidlalweni emithathu ngo-Agasti idlale ngokulingana ngo 0-0, yadliwa kabili ngo 1-0.

Umdlalo obuphakathi kwe-First Touch ladies ne-Richmond United eSeshego Stadium uphele ngo 0-0 kanti oweBloemfontein Celtic ne-UJ Ladies umiswe ngemuva kwesiwombe sokuqala zisabambene ngo 0-0. ISafa ithe onompempe bathole maphakathi nomdlalo ukuthi inkundla ayikho esimeni esifanele ukudlala. Umdlalo usazohlelwa olunye usuku ozobanjwa ngalo.

ICoal City Wizards izibeke endaweni yesishiyagalombili kwi-log ibhaxabula iTsunami Queens ngo 3-0 ePuma Stadium ngeSonto ntambama.

ULungile Mthethwa uvalele amagoli amabili, umkhonto wabe usugwaza ekhaya kwelesithathu eligcine lithintwe nguNthabiseng Mazoe.

ITsunami Queens yilona qembu eselingenise amagoli amaningi kunawo wonke kule ligi njengoba selingenelwe ngamagoli angu-53 emidlalweni engu-14.