UTembo ukhala ngabadlali abanganikezelani ngebhola
UMQEQESHI weSuperSport United uKaitano Tembo ukhala ngabadlali bakhe abalahla ibhola kalula nathi lokho kubaqhatha nezitha emidlalweni yabo yakamuva Isithombe: Backpagepix. Isithombe: Samuel Shivambu/BackpagePix
UKULAHLEKELWA yibhola kalula kweSuperSport United, yinto engehli kahle neze kuKaitano Tembo, oqeqesha Amatsatsantsa A Pitori njengoba sebelahlekelwe yimidlalo emibili kulandelana. Lena yimidlalo ebalulekile kanti baziwa njengeqembu elilwela izicoco.
Ngeledlule behlulwe yiTshakhuma Tsha Madzivhandila (TTM) ngo 1-0 kwiLast 32 yeNedbank Cup, okuyinto engafani neSuperSport (ukuphuma zibekwa kulo mqhudelwano). Leli qembu selidlale kowamanqamu kulo mqhudelwano amahlandla abalelwa kwayisithupha futhi liyaziwa ngokulwela izicoco.
NgoLwesibili ezikaTembo ziphinde zakhala ngaphansi kwiBloemfontein Celtic ngo 2-1, kwiDStv Premiership. ISuperSport iye kulo mdlalo isendaweni yesibili kwi-log, ngemuva komkhaya iMamelodi Sundowns. Ukunqoba kwabo kwiCeltic, bekuzosho ukuthi bayalivala igebe kwiSundowns, nokungasho ukuzibeka ethubeni elingcono lokunqoba isicoco seligi. Sekuwumlando ukuthi lokhu akwenzekanga.
UTembo uthe ukulahlekelwa yibhola kalula, kubaqhatha nezitha.
"Asiqalanga kahle neze emidlalweni yakamuva. Sinomkhuba omubi wokulahlekelwa yibhola kalula. Lokhu kufanele sikugweme. Angisayiphathi eyokuhluleka ukuvalela enethini amathuba esiwatholayo. Silishayile igoli elihle sidlala neCeltic kodwa inhlanhla ibingekho nhlobo. Ngiyasola ukuthi igoli labo lesibili libe yi-offside, kodwa ngisazobhekisisa kahle," kulandisa uTembo.
Umdlalo olandelayo weSuperSport kwiDStv Premiership, izowudlala neCape Town City. UTembo uthe ngokwakhe iCity yiqembu elenza kahle kakhulu kunawo wonke njengamanje kwiPremiership.
"Uma uzokhuluma ngokuhleleka, ngicabanga ukuthi iCity ihamba yodwa kuleli njengamanje. Bayiqembu elisefomini kakhulu futhi eliyingozi uma liya phambili. Okunye ukuthi awusekho umdlalo olula njengamanje kwiligi yethu, yonke inzima. Kufanele sizivuke sizithuntuthe, sizame amaphuzu," usho kanje uTembo.
Ukuphuma kweSuperSport kwiNedbank Cup, kuyenza ukuthi ibe sethubeni elihle lokunqoba isicoco seligi kodwa uma inganqoba imidlalo yayo. Izimbangi zayo iSundowns, kusamele zizihluphe ngeNedbank kanye neCAF Champions League.
ISuperSport ayidlali nakowodwa umqhudelwano weCAF kanti nezicoco kuleli seziyiphelele kwazise umqhudelwano iTelkom Knockout (TKO), awusekho kwiPremier Soccer League (PSL).