Umqeqeshi weChiefs ukhwele wadilika kubadlali
UMQEQESHI weKaizer Chiefs, uGavin Hunt, ugebise ikhanda kufanele njengoba izinto zingahambi kahle kwezakhe okuthe kamuva zaphinda ngokukhishwa kweqembu emqhudelwaneni iNedbank Cup. Isithombe: Gerhard Duraan/BackpagePix
USHIYE angalazi ngabadlali “abathile” kwezakhe uGavin Hunt, ongumqeqeshi weKaizer Chiefs emuva kokungena ehlazweni Amakhosi ehlulwa iRichardsBay FC emdlalweni weLast 32 kwiNedbank Cup ngempelasonto.
Amakhosi ehlulwe iNatal Rich Boyz (Richards Bay FC) kaSifiso "Jomo" Biyela ngo 2-1, ishayelwa ekhaya eFNB Stadium ngeSonto. Amagoli eBay ashaywe isiqongqwane somdlali wasemuva uThabani Dube noSiyabonga Vilane kwathi eleChiefs lashaywa uLeonardo Castro.
Ishaywa nje iChiefs, ibophele izingqwele zayo uSamir Nurkovic, Nkosingiphile Ngcobo noLebogang Manyama abahluleke bancama ukubhakuzisa inethi.
Kuxakile nokho ukuthi esikimini sikaHunt, ubebophele uSiphelele "Stashi" Ntshangane noSiphosakhe Ntiya-Ntiya, abangajwayele ukudlala kwiChiefs. Sekuwumlando ukuthi uNtshangase ukhishiwe, akazange esasidlala isiwombe sesibili kanti uNtiya-Ntiya, uvele wathola ikhadi elibomvu.
Ekhuluma kwithelevishini ngemuva komdlalo, uHunt usho into ebisakuphahluka ngalabadlali bobabili.
"Abanye abadlali bavele bakugile nje. Kodwa ngijabule ukuthi umayihlokoze uvelile ngengihlezi ngikusho ukuthi abanye abadlali abakufanele ukudlalela iChiefs. Kodwa wothi ngithule, angifuni ukukhuluma kakhulu. Yihlazo ukudliwa kwethu, emlandweni wami weminyaka engu-26, ngiyaqala ngqa ukwehlulwa yiqembu elidlala esigabeni esingaphansi kwesePremiership. Iqiniso ukuthi ngiyasazi isimo iqembu elibhekene naso, ngiyasazi futhi isimo nami engibhekene naso," usho kanje uHunt.
Kubukeka sengathi uma uHunt ezoqhubeka nokuba ngumqeqeshi weChiefs, mancane amathuba okuthi uNtshangase noNtiya-Ntiya abagcine ngesizini ezayo, ikakhulukazi njengoba ezobe esekwazi ukusayina abadlali abafisa yena.
"Nginohlu lwabadlali abaningi abadlula ingalo yami, engifuna ukubathenga. Kodwa ngiyasola abanye babo ngeke ngibathole. Kadeni ukuthenga abadlali kuphethwe uBobby Motaung, kodwa sizobambisana naye. Kuzofanele kube nohlelo oluzolandelwa lokuthi kuthengwa baphi abadlali futhi ngaliphi. Le nto yokungena nje emakethe, siwole bonke abadlali esingeke sibadinge ngeke isisize nakancane," kusho uHunt esekhuluma nezintatheli emuva komdlalo.
IChiefs isishwebile isicoco seMTN 8, nakhu manje isiphuthelwe ngeseNedbank Cup. Empeleni nakwiDStv Premiership kayiqalanga kahle neze. UHunt nethimba lakhe labaqeqeshi sekufanele bazikhathaze kakhulu ngokuqeda endaweni ehloniphekile kwi-log yePremiership, ikakhulukazi njengoba amaqembu esedlale imidlalo engu-15 kwiPremiership.