Iphenduke ihlaya iChiefs ikhishwa kwiNedbank Cup
UMGADLI weKaizer Chiefs uSamir Nurkovic ebhinciswe uTshepo Mabua weRichards Bay, emdlalweni weNedbank Cup Last 32 onqotshwe yiNatal Rich Boyz, eFNB Stadium Soweto izolo ntambama. Isithombe: Sydney Mahlangu/BackpagePix
Kaizer Chiefs (0) 1
RichardsBay FC (1) 2
KUYIPHINDILE lokho iKaizer Chiefs, iphenduka ihlaya iwashiswa ijezi yiRichards Bay FC emdlalweni welast 32 yeNedbank Cup, obuseFNB Stadium izolo ntambama.
Amagoli eBay avalelwe phakathi nguThabani Dube noSiyabonga Vilane kwathi elaMakhosi lashaywa nguLeornado Castro. Lilokhu liqhubekile ibhadi leChiefs kwiNedbank, lokushaywa ngamaqembu athathwa "njengamancane". Naseminyakeni edlule iBaroka FC, University of Pretoria, neTS Galaxy nabo babukisa ngeChiefs.
IBay ibibonakala iphila ngemizuzu yokuqala, inobungozi uma iphethe ibhola, yize kade kuyiChiefs ebigcina kakhulu ibhola. Kungazelele muntu, ngomzuzu ka-28, ihambe phambili iBay ngegoli elishaywe umdlali wasemuva nguThabani Dube, emuva kwekhona enhle kaKhanyisa Mayo. Unozinti weChiefs uDaniel Akpeyi, wenze iphutha ephumela ukuyovimba kodwa lamhlula ibhola, lamfica elilindele uDube kwakhala inethi.
Izivakashi zicishe zashaya elesibili ngomzuzu ka-36, uMayo ephinde eshaya enhle ikhona ezingenelayo, kodwa waliphebeza u-Akpeyi, asinda kanjalo Makhosi.
Ithuba eligqamile elakhiwe yiChiefs ngesiwombe sokuqala, libe ngomzuzu ka-44 uSiphelele Ntshangase eshaya ikhona ehlangane nekhanda likaDaniel Cardoso, walibuyisa lahlangana noNkosingiphile Ngcobo odedele intululwane kodwa yaphuma eceleni kwepali.
Isiwombe sesibili bekusho ukuthi kumele Amakhosi ashintshe ukwenza, azame igoli lokulinganisa. USamir Nurkovic ungqofele ngekhanda ikhona likaLebogang Manyama, kodwa walivimba unozinti weBay uMalcolm Jacobs. Ziqhubekile nokuba nzima izinto kwiChiefs uSiphosakhe Ntiya-Ntiya ethola ikhadi elibomvu edlalisa kabi ibhanoyi uKatleho Maphathe maphakathi nesiwombe sesibili.
Nokho ezikaGavin Hunt, zikhombisile ukuthi kungani zingelinye lamaqembu amakhulu nahlonishwayo kuleli zishaya igoli lokulinganisa ngonyawo lukaLeonardo Castro ngomzuzu ka-76. Ibhola alibhajiswe ezintanjeni beligotshwe Leonardo Castro.
Sekuvalwe amehlo iBay ifake igoli lokunqoba elishaywe uVilane, ngomzuzu ka-91, waphela kanjalo umdlalo.
Eminye imiphumela ihambe kanje: Chippa United 4- 3 Free State Stars sekukhahlelwa amaphenathi emuva kubambana ngo 2-2.
Jomo Cosmos 1-2 Black Leopards, Swallows FC 1-0 Cape United.