UHunt akayizwa ekaCardoso kumaphenathi
"ANGITHANDI nhlobo ukuthi uDaniel Cardoso ashaye amaphenathi.“
Lokhu kushiwo umqeqeshi weKaizer Chiefs, uGavin Hunt, emuva kokuthi isithandwa sabalandeli beZimpofana uSamir Nurkovic, sivinjelwe iphenathi unozinti we-Orlando Pirates, uRichard Ofori, ngesiwombe sesibili emdlalweni wabakhaya baseSoweto weDStv Premiership.
Amakhosi agcine ekhale ngaphansi ngo 2-1, eshaywa eZimnyama kulo mdlalo obunezigemegeme. Amagoli ePirates avalelwe phakathi uThembinkosi "Nyoso" Lorch noSiphesihle "Mbesuma" Ndlovu. Elokubika laMakhosi lishaywe uDaniel Cardoso sekuzophela isiwombe sesibili.
UNurkovic uthole ithuba lokushaya iphenathi maphakathi nesiwombe sesibili, iPirates isahamba phambili ngo 1-0. Ukube lo mdlali waseSerbia uyivalele phakathi iphenathi, bekuzowushubisa umdlalo hleze nemiphumela ibizogcina ingamanga ngendlela egcine ime ngayo. Empeleni ngokwejwayelekile uCardoso nguyena ojwayele ukushaya amaphenathi kwiChiefs, kodwa uNurkovic ongukaputeni weChiefs kule zinsuku nguyena onikwe ithuba, kwabhimba.
"Ngasho ngifika lapha ukuthi ngeke uCardoso ashaye amaphenathi. Ngakho anginankinga nakancane nokuthi uSamir, uyithathile yavinjwa," usho kanje uHunt.
Indlela eshaywe ngayo le phenathi ibingeyinhle neze kwazise ukuphakama kwayo bekumvuna u-Ofori ukuthi ayivimbe kanti futhi ayizange iye ngasekhoneni, nobekungenza umsebenzi ka-Ofori ube nzima. Ebuzwa uHunt ukuthi ngabe usazoxoxa yini noNurkovic ngokushweba kwakhe, uHunt uthe: "Cha ngeke ngikhulume naye, kasikho isidingo. Ube neshwa nje washweba, ibhola linjalo.“
Emidlalweni emithathu edlalwe yilezi zinkunzi zaseSoweto kule sizini ka-2020/2021, iPirates iyinqobe yomithathu imidlalo (okuhlanganisa emibili kwiMTN 8, nowodwa weligi). Owokuqala iPirates iqunqobe ngo-3-0, owesibili ngo-2-0 kanye nowangempelasonto ophele ngo 2-1.
"Bekumele siwunqobe umdlalo wethu nePirates. Sithole inqwaba yamathuba kodwa sadlala ngawo. Angazi bekumi kuphi ngampela. Sizenze thina nje ngokushweba amathuba, kulo mdlalo uma ungawashayi amagoli azongena kuwena," kusho uHunt.
Isibabuli sePirates uLorch, sibe ngumdlali ovelele kulo mdlalo wabakhaya. Ebuzwa ngemuva komdlalo ukuthi yini ebenza bebhonye iChiefs kanje kule sizini uthe: "Siyazi ukuthi emuva kabanazo izitobha ezisheshayo. Besifuna ukufaka ngokushesha amabhola asheshayo ngemuva kwabo, nokuyinto esiyenze kahle osukwini sakwazi ukunqoba.“